Քաղաքագետ, Ֆրանսիայի ռազմավարական hետազոտությունների կենտրոնի փորձագետ Կայծ Մինասյանի կարծիքով՝ վարչապետի հրաժարականը, ինչպես միշտ, երկու պատճառ ունի՝ մեկը՝ արտաքին, մյուսը՝ ներքին, թեև այսօրվա աշխարհում ներքին և արտաքին տարբերություններ չկան:
«Վստահ եմ, որ ՀՀ նախագահ Սերժ Սարգսյանը մտածված ձևով ամեն ինչ արեց, որպեսզի այդ հրաժարականը տրվի, որովհետև գիտեր՝ այլևս անկարելի է այդպես շարունակել թե՛ ներքին, թե՛ արտաքին պատճառներով»,- ասաց Կայծ Մինասյանը:
Ներքին պատճառներից է, ըստ նրա, քաղաքացիական ընկերային շարժման ակտիվացումը, որին միացան ընդդիմադիր ուժերը: Արդյունքում սկսվեց նոր գործընթաց, և նախագահն այնպես արեց, որ Տիգրան Սարգսյանին այլ ելք չէր մնում, քան հրաժարականը:
Մեր զրուցակցի դիտարկմամբ՝ երկրորդ պատճառը արտաքին է. «Թեև ՀՀ վարչապետ Տիգրան Սարգսյանը սկզբից ևեթ դեմ էր, որ Հայաստանը միանար ՄՄ-ին, սակայն մի քանի օր առաջ միայն՝ իմանալով, որ հրաժարական է տալու, ՀՀԿ տնտեսական համաժողովին հայտարարեց, որ շատ բացասական նշաններ կան ՄՄ-ում, և սա ցույց է տալիս հրաժարականի պատճառներից մեկը»,- ասաց Կայծ Մինասյանը՝ հավելելով, որ արտաքին առումով կան Ռուսաստանի և Արևմուտքի հետ հարաբերություններ՝ կապված Ղարաբաղի խնդրի հետ:
Ըստ նրա՝ Տիգրան Սարգսյանը վերջացած չէ, քանի որ նա երաշխավորում է դեպի Արևմուտք ուղղությունը, և իբրև Կենտրոնական բանկի նախկին նախագահ՝ բավական վստահություն ունի Արևմուտքում:
Նրա խոսքով՝ այս քայլով Սերժ Սարգսյանը Մոսկվային ցույց տվեց, որ ՄՄ-ն ընթացքի մեջ է: Այս քայլով նա նաև նպատակ ունի կտրել կապը քաղաքացիական ընկերային շարժման և ընդդիմադիր ուժերի միջև. «Չմոռանանք մի բան, որ պարտադիր կուտակայինի դեմ շարժումը ցույց տվեց, որ «Դեմ եմ» շարժումն ու ընդդիմադիր ուժերը համագործակցում են, և որպեսզի այդ կապը կտրի, Սերժ Սարգսյանը այնպես արեց, որպեսզի Տիգրան Սարգսյանը հրաժարական տա, այդ շարժումը տկարանա, և նա հետ շրջի ներքին քաղաքական գործընթացը:
«Բայց լավ է այն, ինչ պատահեց, քանի որ սա նշանակում է, որ հասարակությունը երբ պաշտպանում է իր իրավունքը, արդյունքը միշտ կա: Հասարակությունը ինքը կարող է որոշել իր ճակատագիրը, և դա գիտեն թե իշխանությունը, թե ընդդիմադիր ուժերը, և հասկանում են, որ հասարակությանը պետք է ավելի կարևորություն տալ: ՀՀ քաղաքացիները իրենց իրավունքները վերցնելով իրենց ձեռքը՝ եկան ցույցի նոր գաղափարներով, նոր լոզունգներով, և այս նոր իրավիճակը հույս է, որ հասարակության մեջ նոր շունչ կա. սա շատ դրական քայլ է»,- ասաց Կայծ Մինասյանը:
Նրա խոսքով՝ այժմ կարևոր հարցն այն է, թե ով կլինի հաջորդ վարչապետը, որ կարողանա թե՛ Արևմուտքի և թե՛ Ռուսաստանի հետ մեկ սեղանի շուրջ նստել: Ճիշտը, ըստ նրա, անկախ վարչապետ ունենալն է, անկախ կուսակցական պատկանելությունից, ով իսկապես կփոխի քաղաքական իրավիճակը:
«Կարծում եմ՝ Հայաստանը հիմա կարիք ունի այդպիսի փոփոխությունների»,- հավելեց Կայծ Մինասյանը:
