Քաղաքապետ Կարեն Կարապետյանի հանձնարարությամբ մայրաքաղաքում հասարակական տրանսպորտի աշխատանքները կանոնակարգելու նպատակով, Երևանի 60 բանուկ խաչմերուկներում և կանգառներում արդեն ավարտվել է տեսախցիկների տեղադրման գործընթացը: Հերթական աշխատանքային խորհրդակցության ժամանակ քաղաքապետը հանձնարարել է համաժամանակյա ռեժիմով շարունակել մոնիտորինգի աշխատանքները և իրականացնել մշտական վերահսկողություն:
«Անվտանգ քաղաք» հայեցակարգի շրջանակում քաղաքապետն առաջարկել է համատեղ ծրագիր իրականացնել՝ մեկ ընդհանուր բազայում համատեղելով ոստիկանության և այլ կառույցների տրամադրության տակ գտնվող տեսախցիկները:
Բնակչության անվտանգությունն ապահովելու նպատակով տեսախցիկներ են տեղադրվում նաև Երևանի մետրոպոլիտենում:
Հանձնարարվել է աշխատանքներն ավարտել սահմանված ժամկետներում և լուրջ ուշադրություն դարձնել մետրոյի սպասարկման որակին:
Անդրադառնալով ապօրինի, ժամկետանց և չգործող կրպակների ապամոնտաժման գործընթացին, Կարեն Կարապետյանը հանձնարարել է հետևողականորեն շարունակել աշխատանքը, միաժամանակ շեշտելով, որ նոր կրպակների տեղադրման թույլտվություն չի տրվելու:
Զեկուցվել է, որ հուլիսի 1-ի դրությամբ մայրաքաղաքում արդեն ապամոնտաժվել է 893 ապօրինի, չգործող կրպակ:
Ֆինանսական մուտքերի մասով զեկուցվել է, որ անցած 6 ամիսների կտրվածքով բյուջեի կատարողականը սեփական եկամուտների հավաքագրման ցուցանիշի մասով կազմել է 93 տոկոս: Զեկուցվել է նաև, որ քաղաքապետի հանձնարարությամբ ընթացքի մեջ են գույքային հարկերի բազայի ճշտումները, որոնց հիման վրա ևս ակնկալվում է ֆինանսական ցուցանիշների բարելավում:
Որոշակի տեղաշարժ է արձանագրվել աղբահանության և սանմաքրման ոլորտում հավաքագրումների մասով՝ պայմանավորված զգալի թվով տնտեսվարողների և անհատ քաղաքացիների պայմանագրային դաշտ բերելու հետ:
Անդրադառնալով մայրաքաղաքի բակերի բարեկարգման ծրագրին, Կարեն Կարապետյանը հանձնարարել է շարունակել բակերի մաքրումը բնակիչների կողմից ապօրինի հողազավթած, ՙբոստանային՚ տարածքներից ու փոխարենը բնակիչների համար հանգստի հարմարավետ գոտիներ ստեղծել:
Նշված տարածքներում կտեղադրվեն «Փյունիկ» բարեգործական հիմնադրամի կողմից տրամադրված մարզագույք ու մանկական ժամանակակից խաղեր:
Զեկուցվել է, որ ի կատարումն Երևանի քաղաքապետի հանձնարարականի, այժմ լայն թափով բարեկարգվում են քաղաք մտնող գլխավոր մայրուղիները: Երևան-Աշտարակ, Երևան-Զովունի խճուղիների միջնաշերտն ու Արգավանդի խաչմերուկից դեպի մայրաքաղաք տանող Իսակովի պողոտայի հարակից տարածքները բարեկարգվելուց հետո, ամբողջությամբ կկանաչապատվեն ու կծաղկապատվեն: Ծրագրի համաձայն նշված տարածքները ապահովված կլինեն նաև ոռոգման նոր ցանցով:
Անդրադառնալով համատիրությունների գործունեությանն ու խնդիրներին, Կարեն Կարապետյանը նշել է, որ չնայած նրան, որ համատիրությունները բնակիչների կողմից կամավոր ստեղծված կառույցներ են, այսօր շատ բազմաբնակարանների սեփականատերեր տեղեկացված չեն իրենց իրավունքների և պարտականությունների մասին: Քաղաքապետը մեկ անգամ ևս շեշտել է, որ ողջ գործընթացը, սկսած գումարների հավաքագրումից մինչև ծախսերի արդյունավետ տնօրինում, պետք է վերահսկեն իրենք՝ շենքերի բնակիչները և վարչական շրջանների ղեկավարներին հանձնարարել է առավել արդյունավետ աշխատել համատիրությունների ղեկավարների հետ:
