Երեկ հետևել եք վարչապետ Նիկոլ Փաշինյանի ելույթին, հանրահավաքի ժամանակ տեղի ունեցած միջադեպին, որը որոշ գնահատականներով համարում են սադրանք։ Այս ամենն ակնհայտորեն կապված է Արցախում սպասվելիք ընտրությունների նախընտրական ֆոնի, Սամվել Բաբայանի և իշխանությունների միջև առաջացած իրավիճակի հետ։
Ի՞նչ գնահատականներ ու դիտարկումներ կտայիք․ «Առաջին լրատվական»-ի հարցին արցախցի իրավապաշտպան Կարեն Օհանջանյանը պատասխանեց․«Նախ, ես ողջունում եմ երեկվա հանրահավաքը, դա առաջին անգամ էր, որ Հայաստանի ղեկավարությունը ելույթով հանդես է գալիս Արցախի բնակչության առջև։ Այդ տեսանկյունից ինձ համար շատ հետաքրքիր էր լսել Նիկոլ Փաշինյանի տեսակետը թե՛ Հայաստանի և թե՛ Արցախի ներքին իրադարձությունների մասին, և լսել նրա գնահատականն այն պրոցեսների, որոնք տեղի են ունենում Արցախի շուրջ։ Խոսքը վերաբերում է բանակցություններին, որոնք տեղի են ունենում ԵԽԽՎ Մինսկի խմբի շրջանակներում և այլ միջկառավարական ինստիտուտների շրջանակներում։ Ինչպես նաև վարչապետի գնահատականն այն պրոցեսներին, որոնք տեղի են ունենում թավշյա հեղափոխությունից հետո թե՛ Հայաստանում, թե՛ Արցախում» ։
«Ցավոք, հանրահավաքը չանցավ առանց միջադեպի։ Միջադեպը ստեղծեցին մի խումբ մարդիկ, որոնց առաջնորդում էր Արցախի ինքնապաշտպանական ուժերի նախկին հրամանատար Սամվել Բաբայանը։ Նրանց արարքն համարում եմ անհարգալից վերաբերմունք այս հրապարակում հավաքված մարդկանց նկատմամբ, որովհետև դրանով նրանք դիպչում են իմ ինքնասիրությանը։ Ես հանրահավաքից հետո հանդիպել եմ մարդկանց, որոնք արտահայտում էին իրենց վրդովմունքը։ Նրանք, լինելով քաղաքակիրթ, չեն տրվել սադրանքի, բայց ես գտնում եմ, որ իշխանությունները պետք է հետաքննություն անցկացնեն այդ միջադեպի հետ կապված։ Ես Սամվել Բաբայանին համարում եմ ահաբեկիչ»,- հավելեց իրավապաշտպանը։
Մանրամասները՝ տեսանյութում։