Ազգային ժողովի «Ժառանգություն» խմբակցության ղեկավար Ռուբիկ Հակոբյանի խոսքին արձագանքելով՝ ելույթ ունեցավ ՀՀԿ խմբակցության պատգամավոր Խոսրով Հարությունյանը:
Ռուբիկ Հակոբյանը նշել էր, որ ոչ թե իրենք են իրականությանը նայում սև ակնոցով, այլ իշխանությունն է վարդագույն ակնոց կրում: «Չգիտեմ՝ ես դալտոնի՞կ եմ, թե՞ չէ, կյանքը շատ բաների մասին է խոսում, բայց այն մարդիկ, որ ինձ որակեցին, բոլոր հիմքերն ունեմ ասելու՝ նրանք էլ քաղաքական իմպոտենտ են, որովհետև նախագահական ընտրություններից հետո ունենալ 500 հազար ձայն և մեկ ամսում փչացնել, դրա համար հարկավոր է լինել ընդամենը իմպոտենտ, քաղաքական իմպոտենտ՝ ոչ ավել, ոչ պակաս: Վերջապես, ի՞նչ ա նշանակում. մարդ չի կարող իր կարծիքն ասի, որ հակառակ է, ենթադրենք, ընդդիմադիրի կարծիքին, էս ի՞նչ բան էր. մեզ խորհուրդ չտաք, մեզ չսովորացնեք. . .»,- ասաց նա՝ ընդգծելով, որ խորհրդարանի դահլիճում կան մարդիկ, ում կենսափորձը թույլ է տալիս ոչ միայն դժգոհողներին, այլև նրանց սերունդներին խորհուրդներ տալ, ուստի թող բարի լինեն, սովորեն միմյանց լսել:
Հարությունյանը նշեց՝ պատգամավորական հարաբերությունների էթիկան ենթադրում է մի քիչ այլ վարքագիծ, ուստի եթե խոսում են հանդուրժողականությունից, միմյանց լսելու կարողությունից, ունակությունից, ապա թող բարի լինեն լսել: Ինքը՝ Հարությունյանը, նշում է, որ ամբողջ պատգամավորական գործունեության ընթացքում ԱԺ ամբիոնից երբևէ որևէ մեկին անձնական վիրավորանք չի հասցրել, որովհետև իր համար դա շատ կարևոր է: «Սա ՀՀ խորհրդարանի ամբիոնն է, ամենակարևոր քաղաքական ամբիոնը, և բարի եղեք հարգել դա»,- ասաց նա:
