ՀՀ նախագահ Արմեն Սարգսյանը հրամանագրեր է ստորագրել կրտսեր սերժանտ Արման Արայիկի Բուլղադարյանին հետմահու պարգևատրել Մարտական ծառայության մեդալով։ Հրամանգիրը՝ ստորև․
«Հիմք ընդունելով վարչապետի միջնորդությունը՝ համաձայն Սահմանադրության 136-րդ հոդվածի, ինչպես նաև «Հայաստանի Հանրապետության պետական պարգևների և պատվավոր կոչումների մասին» օրենքի 5.3-րդ հոդվածի 1-ին մասի.
Հայրենիքի սահմանները պաշտպանելիս ցուցաբերած խիզախության և անձնվիրության համար թիվ N զորամասի պայմանագրային զինծառայող, կրտսեր սերժանտ Արման Արայիկի ԲՈՒԼՂԱԴԱՐՅԱՆԻՆ հետմահու պարգևատրել Մարտական ծառայության մեդալով»:
Հիշեցնենք, որ հուլիսի 28-ին՝ ժամը 18:40-ի սահմանում, ՀՀ ՊՆ N զորամասի պահպանության շրջանի մարտական դիրքի ուղղությամբ հակառակորդի կողմից արձակած կրակոցից գլխի շրջանում հրազենային վիրավորում էր ստացել պայմանագրային զինծառայող 24-ամյա Արման Արայիկի Բուլղադարյանը: Նոյեմբերյանի բժշկական կենտրոն տեղափոխվելու ճանապարհին Արման Բուլղադարյանը մահացել է: Նա 1,5 տարի առաջ էր Հայաստան վերադարձել, ավելի վաղ Ռուսաստանում էր: Հայրենիք վերադառնալուն պես անցել էր պայմանագրային ծառայության:
