«Թուրքիան մեկ-երկու ուղղությամբ արդեն բավականին նահանջ է կատարել ՆԱՏՕ-ից և ՆԱՏՕ-ին անդամակցության պարտավորություններից ու ԱՄՆ-ի հետ համագործակցությունից և գնացել է դեպի Ռուսաստանի հետ մերձեցման»,- «Առաջին լրատվական»-ի հետ զրույցում ասաց քաղաքագետ Գարիկ Քեռյանը՝ անդրադառնալով թուրք-ամերիկյան հարաբերությունների լարվածությանը:
Նրա խոսքով՝ մեր հիմնական ռազմաքաղաքական դաշնակից Ռուսաստանը, փաստորեն, մտնում է լուրջ ռազմաքաղաքական համագործակցության մեջ Թուրքիայի հետ: Այս առնչությամբ քաղաքագետը ներկայացրեց Հայաստանի շահերի տեսակետից երկու հակադիր կարծիքներ՝ քաղաքագետների մի մասը սա վտանգավոր է համարում Հայաստանի համար, մյուսները՝ ընդհակառակը. «Լավ է դա, թե վատ Հայաստանի համար՝ ապագան ցույց կտա»:
Ինչպես նշեց քաղաքագետը՝ C-400 զենիթահրթիռային համակարգերի ձեռք բերումը զգալիորեն բարձրացնում է Թուրքիայի ազդեցությունը տարածաշրջանում. «Եվ Սիրիայի կարգավորման գործը արդեն անհնար կլինի առանց Թուրքիայի շահերը հաշվի առնելու: Եվ սա, իմ կանխազգացողությամբ, այնքան էլ Իրանի սրտով չէ, և Իրանը այնքան էլ ոգևորված չէ այս համագործակցությամբ: Միաժամանակ Իրանի ձեռքերն էլ շաղկապված են, որովհետև նա ստիպված է հաշվի առնել Ռուսաստանի դիրքորոշումը»:
Հարցազրույցն ամբողջությամբ՝ տեսանյութում:
