«Եթե հաստատությունը կոչվում է դատարան, ապա նրա անդամները, անկախ նրանից՝ ունեն կոչում, թե չունեն կոչում՝ դատավորներ են։ Ինչպես կարող է Սահմանադրական դատարանի անդամը դատավոր չլինել։ Անկախ նրանց՝ նրան այդպիսի կոչում տվել են, թե ոչ։ Կարճ ասած՝ եթե Սահմանադրական դատարան է, ուրեմն դատավորներ են, իսկ եթե Սահմանադրական դատարան չի, ուրեմն դատավորներ չեն»,-«Առաջին լրատվական»-ի հետ զրույցում ասաց իրավաբանական գիտությունների դոկտոր, պրոֆեսոր, ՀՀ վաստակավոր իրավաբան, 1990թ. ՀՀ Գերագույն դատարանի նախագահ Տարիել Բարսեղյանը՝ անդրադառնալով վերջին օրերի վեճին՝ կապված ՍԴ անդամ-ՍԴ դատավոր եզրույթի հետ։ Բարսեղյանը պնդեց, որ ՍԴ անդամները դատավոր են, այլապես հակասություն է առաջանում հենց Սահմանադրության հետ։ Նրա խոսքերով՝ այս օրերին հնչող մեկնաբանությունները տեխնիկական են, կամայական են, որը ընդունելի չէ։ «Դատարանում դատ կարող են անել միայն դատավորները, անկախ նրանից՝ նրանք դատավորի աստիճան ունեն, դա նրանց տրվել է, թե ոչ։
Կոչումը որևէ նշանակություն չունի։ Եթե ՍԴ անդամը դատ է անում, ուրեմն նա դատավոր է»,- ասաց նա։
Մեր դիտարկմանը՝ որ այս օրերին հենց այդ մեկնաբանությունը որակվում է որպես դատական իշխանության յուրացում, քանի որ ՍԴ անդամները որևէ իրավասություն չունեն՝ հանդես գալու որպես ՍԴ դատավորներ և իրականացնելու դատավորի լիազորություններ, Բարսեղյանն արձագանքեց. «Ես արդեն ասացի՝ եթե անձը դատ է իրականացնում, ուրեմն դատավոր է։ Այսօր որևէ ճգնաժամ գոյություն չունի։ Պատմությունը ցույց է տալիս, որ բոլոր պարագայում ընտրում են այն շարքայինին, որը մեղավոր է։ Իսկ մեր երկրում այդ մեղավորը դատավորն է ու դատարանը։ Մինչդեռ, համակարգային մեղավորություն գոյություն ունի։
Որևէ անհատի, որևէ դատավորի մեղադրելը աբսուրդ է»։
Տարիել Բարսեղյանը նույն կարծիքին է նաև Բարձրագույն դատական խորհրդի մասով։ Նրա խոսքերով՝ տեղի է ունեցել ընտրություն, մարդկանց ընտրել են, և դա դուր է գալիս մարդկանց, թե ոչ, այլ հարց է։ Կարևորն այն է, որ ճիշտ, օրինական ընտրություն է եղել։ «Եթե մարդը ընտրվել է և այդ ընտրության պրոցեսում որևէ խախտում չի եղել, ապա որն է խնդիրը։ Օրենսդրորեն կա մի մարմին, որին տրված է լիազորություն՝ ընտրել թեկնածուների։ Ելնեն այն կանխավարկածից, որ այդ մարմնում ինչ-որ մեկին դուր չի գալիս ընտրված մարդը, դա ուրիշ խնդիր է։ Այլ հարց է, որ այդ մարմինն առհասարակ մեզ պետք էր, թե ոչ։ Սա ուրիշ քննարկման հարց է։ Ինչ վերաբերում է ԲԴԽ-ին, ապա մենք պետք է տեսնենք՝ ինչ մարմին է այն, ինչպես է աշխատում, ընտրության կարգն ինչպիսին է, ընտրության կարգն ապահովում է արդարացի ընտրություն։ Այս բաղադրիչների առկայության դեպքում արդեն բնավ կարևոր չէ՝ Պողոսն է ընտրվել, թե Պետրոսը։ Հարցը պետք է լուծել ամբողջությամբ վերցրած»,- եզրափակեց Տարիել Բարսեղյանը։
Հիշեցնենք, որ հունիսի 11-ին Դատավորների ընդհանուր ժողովում դատավորները ընտրեցին ԲԴԽ երեք անդամներին՝ Նախշուն Տավարացյանին, Ռուբեն Վարդազարյանին ու Մեսրոպ Մակյանին։
