Թուրքական Anadolu գործակալության փոխանցմամբ՝ Սահմանադրական դատարանը մերժել է քուրդ նորընտիր պատգամավոր Հաթիփ Դիջլեի դատական հայցը։
Հունիսի 12-ին կայացած խորհրդարանական ընտրություններից հետո Թուրքիայի Բարձրագույն ընտրական խորհուրդը (YSK) վետո էր դրել Դիջլեի պատգամավորության վրա՝ դա պատճառաբանելով նախկինում ահաբեկչությանն աջակցելու պատճառով նրա ազատազրկված լինելով։ Արդյունքում Դիջլեի փոխարեն, Դիարբեքիրից թուրքական խորհրդարան էր անցել իշխող «Արդարություն և զարգացում» կուսակցության (ԱԶԿ) ներկայացուցիչ Օյա Էրոնաթը։
Բացի այդ, դատարանը մերժել է Էրոնաթի պատգամավորական գործունեությունը կասեցնելու հայցը։
Հիշեցնենք, որ YSK-ն նաև հունիսի 12-ի խորհրդարանական ընտրություններից առաջ էր վետո դրել Դիջլեի և մի շարք այլ անձանց թեկնածության վրա։ Սակայն քրդերի զանգվածային բողոքներից ու Թուրքիայի մի շարք շրջաններում քաոսային իրավիճակ առաջացնելուց հետո ստիպված էր եղել հետքայլ կատարել՝ թույլատրելով Դիջլեին և մյուսներին մասնակցել խորհրդարանական ընտրություններին։
Ներկայումս YSK-ն գտնում է, որ Դիջլեն պատգամավոր կարող է դառնալ 2014 թվականից ոչ շուտ։ Ի դեպ, 1994-2004 թվականներին Դիջլեն անցկացրել է բանտում՝ «հայրենիքի դավաճանության» համար։
