Այսօր՝ հունիսի 24-ին, հրավիրվել է Ազգային ժողովի արտահերթ նիստ: Այժմ քննարկվում է Քրեակատարողական օրենսգրքում փոփոխություններ և լրացումներ կատարելու մասին օրենքի նախագիծը 1-ին ընթերցմամբ ընդունելու մասին հարցը:
Հարցի քննարկմանը «Լուսավոր Հայաստան» խմբակցության պատգամավոր Անի Սամսոնյանը կրկին անդրադարձավ իրենց խմբակցության ղեկավար Էդմոն Մարուքյանի առաջարկին՝ ասելով. «Դուք գիտեք, որ մեր հարևան Վրաստանում կատարվում են իրադարձություններ, և այդ ֆոնին պարոն Մարուքյանն առաջարկում էր ընդամենը ակտիվացնել Գյումրիի օդանավակայանի տրանզիտային չվերթները: Հիմա դուք առաջարկի վրա կենտրոնանալու փոխարեն՝ կենտրոնացել եք ոճաբանության վրա. Նախ՝ չեմ հասկանում, թե ինչու եք մտահոգվել «փայլուն կառավարություն» արտահայտությունից, որովհետև դա ձեր արտահայտությունն է, միգուցե ձեր կառավարությունը այդքան էլ փայլուն չէ, և դրա համա՞ր է այդ բառն այդքան անհանգստացրել ձեզ: Եվ երկրորդ՝ ինչո՞ւ եք մտահոգվել նաև «սիրուն աղջիկ» արտահայտությունից, որն ընդամենը կոմպլիմենտ էր»:
Անի Սամսոնյանի խոսքով՝ պետք է ազնիվ լինել և խոստովանել, որ այդ «սիրուն աղջիկը» մինչև այժմ որևէ արդյունք չի տվել. «Սա ընդամենը կոչ էր, որպեսզի դուք ակտիվացնեք «փայլուն կառավարությանը» և «սիրուն աղջկան», որպեսզի աշխատեք և Գյումրիի օդանավակայանը ակտիվացնեք: Եվ ի վերջո, եթե ձեր անգործությունը արդարացնեք այսպես, և տրանզիտային օդանավակայան դառնան Բաքուն, Անկարան, ապա ես խոսքեր չունեմ ասելու՝ կարող եք ժամանակ ծախսել բամբասկոտ տղամարդկանց նման արտահայտություններ անելով, իսկ այդ ընթացքում կշահեն Բաքուն և Անկարան: Շարունակեք այդ գործելաոճը և կենտրոնացեք «ոճաբանության», բայց ոչ առաջարկի վրա, և այդպես էլ անգործության մեջ մնացեք»:
Մանրամասները՝ տեսանյութում:
