Վրաստանի նախագահ Սալոմե Զուրաբիշվիլին երկրի ապակայունացման մեջ Մոսկվային է մեղադրել։ Համապատասխան հայտարարությամբ նա հանդես է եկել Facebook-ում։
«Երկրի և հասարակության պառակտումը, ներքին դիմակայությունը ոչ ոքի ձեռնտու չէ, բացի Ռուսաստանից և այսօր դա նրա ամենափորձված զենքն է»,-գրել է նախագահը։ Նրա խոսքով՝ տվյալ իրավիճակում ռուսական հինգերորդ շարասյունն ավելի վտանգավոր է, քան ակնհայտ ագրեսիան։
Զուրաբիշվիլին ընդգծել է, որ նրանք, ովքեր խթանում են Վրաստանի ներքին դիմակայությունները, աջակցում են ռուսական քաղաքականությանը և իրականացնում Կրեմլի ծրագրերը։
«Ռուսաստանը ներ թշնամին է և բռնազավթողը»,-եզրափակել է նա։
Ավելի վաղ Վրաստանի ՆԳ նախարարությունը բողոքի ցույցերը հեղաշրջման փորձ է անվանել։
Հիշեցնենք, որ Թբիլիսիում բողոքի ակցիայի ժամանակ առնվազն 52 մարդ է տուժել, ներառյալ՝ 38 իրավապահ։ Հատուկ ջոկատայինները ցուցարարների ուղղությամբ ռետինե փամփուշտներով կրակ են բացել, իսկ ոստիկանությունն արցունքաբեր գազ է կիրառել։