Այսօր՝ հունիսի 4-ին, Ազգային ժողովում շարունակվում են աշխատանքները: Այժմ քննարկվում է Դատական ակտերի հարկադիր կատարման մասին օրենքում փոփոխություններ և լրացումներ կատարելու մասին օրենքի նախագիծը 1-ին ընթերցմամբ ընդունելու մասին հարցը:
«Ես շնորհակալության առիթ չունեմ պարոն Զեյնալյանին»,- հայտարարեց «Լուսավոր Հայաստան» խմբակցության պատգամավոր Արման Բաբաջանյանը՝ հավելելով, որ ցանկանում է բարձրացնել երկու հարց, որոնք կապ չունեն քննարկվող նյութի հետ:
«Մենք ենթադրում էինք, որ երկրում դրված փոփոխությունները կարող են նաև մի սփյուռքահայ գործարարի ճակատագիր փոխել, որի հետ մասնագիտությանս բերումով սկսել եմ առնչվել տարիներ ի վեր»,- ասաց պատգամավորը:
«Նախկին իշխանությունները՝ Սերժ Սարգսյանի եղբոր՝ Լևոն Սարգսյանի գլխավորությամբ, ունեզրկել են այս մարդուն, նրա ընկերությունը սնանկ է ճանաչվել ամբողջ պետական համակարգի գործուն մասնակցությամբ»,- նշեց նա:
Արման Բաբաջանյանը հավելեց, որ այդ սփյուռքահայի գործով Հայաստանը այս պահին Միջազգային տնտեսական դատարանում է, և Հայաստանի շահերը այդ դատարանում ներկայացնում է «Կոնցեռն Դիալոգ» ընկերությունը: Հայաստանի արդարադատության նախարարությունը շարունակում է այս ընկերության ծառայություններից օգտվել. «Այս ընկերության բաժնետեր է նաև Ռոբերտ Քոչարյանի շահերը ներկայացնող փաստաբան Արամ Օրբելյանը, որին մենք ժամը վճարում ենք 250 դոլար այս գործով»:
Արման Բաբաջանյանի խոսքով՝ սա խորը անհանգստության առիթ է. «Մենք չենք կարող հանդուրժել այս գործելաոճը»:
Մանրամասները՝ տեսանյութում:
