Չեն դադարում խոսակցություններն այն մասին, որ Ադրբեջանում վերջերս մի քանի անգամ լայնամասշտաբ զորավարժություններ են տեղի ունեցել, որ Ադրբեջանն էվակուացրել է բնակավայրերը, առաջնագծի երկայնքով ավարտել ինժեներատեխնիկական աշխատանքները, դադարեցրել կամ նվազագույնի հասցրել կրակոցները: Ի՞նչ է սա նշանակում՝ սա դադար է փոթորկից առա՞ջ. Ի թիվս այլ հարցերի, «Առաջին լրատվական»-ի այս հարցին ի պատասխան՝ Պաշտպանության նախարարի մամուլի խոսնակ Արծրուն Հովհաննիսյանը մասնավորապես ասաց. «Բնականաբար, ես նման հայտարարություններին մամուլից չեմ իրազեկվում, և եթե զուտ այդ հայտարարությունը դիտարկենք՝ այնտեղ փոխադարձ հակասություններ կան: Ինժեներական աշխատանքները երբեք չեն դադարում և երբեք չեն դադարելու, որովհետև առաջնագիծ ունենալը, առաջնագծում զորք պահելը նշանակում է մշտապես ինժեներական աշխատանքներ անել: Ո՛չ մենք, ո՛չ իրենք չեն դադարեցնելու այդ աշխատանքները, դա մշտական գործընթաց է՝ սա մեկ: Երկրորդ՝ նրանք տևական ժամանակ է՝ չեն կրակում, չնայած, այսպես ասած, որոշակի առանձին օրերի բացառություններին: Բարեբախտաբար, մեր երկրի ղեկավարի և նրանց նախագահի բանավոր պայմանավորվածությունները գործում են, ինչն, ըստ էության, մենք շատ կարևոր ենք համարում: Գյուղական համայնքներ դատարկել և այլն՝ ես նման տեղեկություններ չունեմ»:
«Շատ հաճախ ենք մենք չափազանցում իրադարձությունները, բայց, միևնույն ժամանակ, երբեք չէի ուզենա լրիվ հանգիստ վիճակում լինենք, որովհետև ի վերջո գործ ունենք հակառակորդի հետ, որը անթաքույց զինվում և բացահայտ ասում է, որ իր նպատակը սա է»,- հավելեց նա:
Հայկական կողմը նույնպես զինվում է և պատրաստ է հակադարձելու. «Առաջին լրատվական»-ի այս դիտարկմանը Ա. Հովհաննիսյանը արձագանքեց. «Զինվելու մասին մենք շատ չենք սիրում խոսել՝ չնայած մեր մամուլը էլի երբեմն-երբեմն անդրադառնում է կնքվող պայմանագրերի, մատակարարումների կամ այլ առիթներով»:
Մանրամասները՝ տեսանյութում։
