«Բարգավաճ Հայաստան» խմբակցության պատգամավոր Ստեփան Մարգարյանն արդյունավետ է գնահատում այդ կուսակցության նախաձեռնած հանդիպումները այլ կուսակցությունների հետ:
Հիշեցնենք, որ ԲՀԿ նախագահ Գագիկ Ծառուկյանը «միասնական քաղաքական և տնտեսական օրակարգ կազմելու և դրան հասնելու «ճանապարհային քարտեզ» ձևավորելու նպատակով» կոնսուլտացիաներ է նախաձեռնել ընդդիմադիր քաղաքական ուժերի հետ, որի շրջանակներում անցած շաբաթ ԲՀԿ փոխնախագահ Վարդան Օսկանյանը և Ս. Մարգարյանը հանդիպել էին Դաշնակցության ղեկավարների՝ Հրանտ Մարգարյանի, Արմեն Ռուստամյանի և Աղվան Վարդանյանի հետ: Վաղն արդեն ԲՀԿ ղեկավարությունը կհանդիպի ՀԱԿ-ի ղեկավարության հետ, հետո՝ «Ժառանգություն» կուսակցության հետ:
«Հանդիպումների այս շարքը ես գտնում եմ շատ արդյունավետ, առաջին հանդիպումը Դաշնակցության հետ բավականին արդյունավետ էր, շատ երկար քննարկվեց, մոտ մեկուկես-երկու ժամ մենք քննարկել ենք բոլոր հարցերը, որոնք հուզում էին կողմերից որևէ մեկին՝ առանձին-առանձին»,- ասաց Ս. Մարգարյանը:
Ս. Մարգարյանը խուսափեց ուղղակիորեն պատասխանել, թե ՀՅԴ-ի հետ հանդիպման ժամանակ կառավարության անվստահության կամ ընդհանուր իշխանափոխության հարց քննարկվե՞լ է, թե՞ ոչ: «Որևէ հարց հենց այնպես քննարկելու համար չի լինում: Իսկ ով ասեց, որ չի քննարկվում, այդ հարցը քննարկվում էր վաղուց, այդ հարցի մասին ևս մենք խոսել ենք և առաջիկայում անելիքների մասին կլինի հայտարարություն: Դա առանձին վերցրած հարց չէ, դա կախված է բազմաթիվ գոծոններից: Մենք կառավարության փոփոխություն ասելով՝ հասկանում ենք այնպիսի կառավարություն, որն ունենա աշխատանքի որոշակի սկզբունք, աշխատանքի որոշակի գաղափարախոսություն: Օրինակ՝ տնտեսական բնագավառում ինչպիսի քաղաքականություն ենք ենթադրում նոր կառավարություն ունենալու պարագայում և ինչը չի բավարարում այս կառավարությունից: Մինչև չլինեն այս կամ այն բնույթի հարցերը, թե ինչպիսին ենք ուզում լինի կառավարությունը, անիմաստ է խոսել այդ մասին»,- ասաց նա:
Ս. Մարգարյանը նաև չպատասխանեց հարցին, թե քննարկե՞լ են արդյոք նախագահի հրաժարականի հարցը: Իսկ դիտարկմանը, թե Գ. Ծառուկյանի այդ հանդիպումները կարծես թե նպատակ ունեն ապացուցելու, որ նա նման է Վրաստանի նախկին վարչապետ Բիձինա Իվանիշվիլիին, Ս. Մարգարյանը պատասխանեց, թե նպատակ կա փչացնել ՀԱԿ առաջնորդ Լևոն Տեր-Պետրոսյանի այդ համեմատությունը: «Այդ մասին այնքան խոսվեց: Ես հասկանում եմ, որ որոշակի նպատակային բան կա փչացնելու Տեր-Պետրոսյանի կողմից ասած այդ թեզը: Ես հասկանում եմ, որ լրատվամիջոցները ուզում են փչացնել դա, բայց այնքան ենք խոսել, որ հիմա անիմաստ է խոսելը: Իհարկե, ոչ: Այս գործընթացը ստեղծվել է շատ ավելի վաղ, քան հանրահավաքն էր»,- պատասխանեց ԲՀԿ պատգամավորը:
Բայց չէ՞ որ Գ. Ծառուկյանին համեմատում են նաև Ուկրաինայի նախկին նախագահ Վիկտոր Յանուկովիչի հետ, ով այդ երկրում եղել է քրեաօլիգարխիկ համակարգի կլաններից մեկը: «Անիմաստ եմ համարում այդ մասին խոսել, և ես չեմ լսել այդպիսի համեմատություն»,- եզրափակեց Ս. Մարգարյանը:
