Մինչ ԲՀԿ առաջնորդ Գագիկ Ծառուկյանը խուսափում է իրեն ու իր ղեկավարած կուսակցությանը ընդդիմություն անվանել, ՀԱԿ-ը շտապում է նրան ընդդիմության հավանական լիդերի ու բուրժուադեմոկրատական հեղափոխության հավանական առաջնորդի թեկնածու դարձնել: Տպավորությունն այն է, որ անհիմն շահարկվում է Գագիկ Ծառուկյանի անունը:
«Ոմանք իրավիճակը ուզում են խառնել, տարբեր նախադասություններ կազմել: Եթե նման պահ գա, Գագիկ Ծառուկյանը ինքը կարող է էդ մասին խոսել»,- «Ժամանակի» հետ զրույցում ասաց ԲՀԿ-ական տնտեսագետ, նախկին պատգամավոր Վարդան Բոստանջյանը` շարունակելով. «Իսկ մնացածի խոսքերը ես չեմ կարող ընդունել հիմք: Եթե նման իրավիճակ լինի կամ նման պահանջ լինի, ինքը` Գագիկ Ծառուկյանը էնպիսի հնարավորություն ու հզորություն ունի, որ ինքը կարող է ասել: Էս պահին ինքը չի արտահայտել իր միտքը, և դրա վերաբերյալ մտածել, ով ինչ է ասում, առնվազն անհեռանկար է»:
ԲՀԿ-ականից հետաքրքրվեցինք, թե Գագիկ Ծառուկյանը այս կամ այն կերպ երբևէ ցանկություն դրսևորե՞լ է ինչ-որ պահի ընդդիմության լիդերությունը ստանձնել կամ կարո՞ղ է ղեկավարել բուրժուադեմոկրատական հեղափոխությունը: «Ես հակված չեմ մտածել` ով ինչ է ասում Գագիկ Ծառուկյան անձի վերաբերյալ: Ես մեր համատեղ աշխատանքից մի բան գիտեմ, որ Գագիկ Ծառուկյանին ես ճանաչում եմ որպես մի անձնավորության, որն ունի մտահոգություն իր ազգի, իր ժողովրդի, իր պետության համար: 25 հազար մարդ այսօր աշխատում է այն տիրույթում, որը ղեկավարվում է Գագիկ Ծառուկյանի կողմից»,- ի պատասխան ասաց Վարդան Բոստանջյանը:
ԲՀԿ-ականից նաև հետաքրքրվեցինք, թե ինքը նման հեռանկար տեսնո՞ւմ է, որ Գագիկ Ծառուկյանը կարող է ընդդիմության առաջնորդ դառնալ կամ անգամ բուրժուադեմոկրատական հեղափոխություն անել: «Որտե՞ղ է սպասվում բուրժուադեմոկրատական հեղափոխություն»,- հարց ուղղեց Բոստանջյանը` շարունակելով. «Ես դժվար եմ հասկանում հեղափոխություններից, բայց ես հասկանում եմ մի բան, որ եթե նման որևէ ցանկություն կամ միտում լինի, դրա վերաբերյալ էդ ձևի հզոր մարդիկ կարող են արտահայտվել»:
Մեր դիտարկմանը, թե ԲՀԿ առաջնորդը նաև Սերժ Սարգսյանի կողքին է այսօր, միջոցառումների է մասնակցում և այլն, Վարդան Բոստանջյանը հայտարարեց. «Ընդհանրապես ինքը պետականաշինության գործում միշտ էլ եղել է առաջամարտիկների շարքում: Ինչ է նշանակում` էս մեկի կողքին կամ մյուսի կողքին: Ինքը ամեն լավ բանի կողքին է»:
ԲՀԿ-ական պատգամավոր Լյովա Խաչատրյանը չի հավատում բուրժուադեմոկրատական հեղափոխությանը: «Մենք ո՞ր հասարակարգում ենք ապրում, որ բուրժուադեմոկրատական հեղափոխություն անենք, ես չեմ հասկանում: Ինչ բուրժուադեմոկրատական հեղափոխություն, ինչ բառեր եք հորինում, ես չեմ հասկանում: Ես չգիտեմ` ինչ է նշանակում` բուրժուադեմոկրատական հեղափոխություն: Որ Ծառուկյան Գագիկը էսօր ժողովրդի կողմից ամենաընդունված անձանցից մեկն է, դա միանշանակ է»,- ասաց Լյովա Խաչատրյանը:
Մեր հարցին` Ծառուկյանը կամ ԲՀԿ-ն ընդդիմություն դառնալու ծրագիր ունե՞ն, ԲՀԿ պատգամավորը պատասխանեց. «Գագիկ Ծառուկյանը միշտ հայտարարել է, որ լինելու է ժողովրդի կողքին և բազմիցս ասել է, որ երբ երկրում ամեն ինչ նորմալ կլինի, ինքը քաղաքականությամբ զբաղվելու ցանկություն չունի: Այսօր Ծառուկյանը ժողովրդի կողմից ամենաընդունված անձերից մեկն է և միշտ ասել է, որ լինելու է ժողովրդի կողքին»:
Հետաքրքրվեցինք նաև, թե ժողովուրդ ասելով` Լյովա Խաչատրյանը նաև Սերժ Սարգսյանի՞ն ի նկատի ունի, քանի որ Գագիկ Ծառուկյանը նաև Սերժ Սարգսյանի կողքին է և երբևէ չի ասում, որ կարող է դեմ գնալ իշխանությանը կամ Սերժ Սարգսյանին: «Ես ժողովուրդ ասելով` ի նկատի ունեմ ողջ հայ ժողովուրդը: Մեծամասնությունը ինչ դիրքորոշում կունենա, այդ դիրքորոշումն էլ կպաշտպանի ԲՀԿ-ն, կարծում եմ»,- ասաց ԲՀԿ-ականը` բացատրելով. «Հայաստանը շատ փոքր երկիր է: Բոլորը միմյանց ճանաչում են, միմյանց կողքին են: Բայց արտաքին-ներքին քաղաքականության առումով, հնարավոր է կարծիքները տարբեր լինեն: Դա չի խանգարում, որ մարդիկ միասին լինեն աշխատանքի բերումով կամ որպես ԱԱԽ անդամ, որպես խոշոր կուսակցության ղեկավար, որպես ՀՀ քաղաքացի շփվեն: Եվ մեկը մյուսի հետ խառնել պետք չի»:
