Երևանի պետական տնտեսագիտական համալսարանի աշխատողների աշխատավարձեը ոչ միայն 10 տոկոսով ավելացել է հեղափոխությունից հետո և հեղափոխության շնորհիվ, այլև այս մեկ տարվա ընթացքում այդ համալսարանի աշխատակիցները երկու անգամ պարգևատրում են ստացել նորից հեղափոխությունից հետո և հեղափոխության շնորհիվ։ Այս մասին «Առաջին լրատվական»-ի հետ զրույցում նշեց «Իմ քայլը» խմբակցության պատգամավոր Գևորգ Պապոյանը։
Նրա խոսքով, այն հսկայական գումարները, որ տրվում էին Կարեն Ավագյանի հիմնադրամին, այդ գումարներն ուղղվել են դասախոսների աշխատավարձերի բարձրացմանը, լսարանների նորոգմանը. «Ուստի ինձ համար շատ տարօրինակ էր, որ պրոֆեսորադասախոսական կազմի, վարչական ապարատի որոշ ներկայացուցիչներ նման բան են գրում։ Չնայած տարօրինակ չէր, որովհետև ես նրանց բոլորին լավ ճանաչում եմ, գիտեմ ինչու են դա գրել, գիտեմ իրենց կարոտախտի պատճառը»,-ասաց Պապոյանը՝ անդրադառնալով տվյալ համալսարանի աշխատակիցների գրառմանը, թե ուզում են, որ Քաղաքացու օրվա հետ կապված ծախսերի իրենց բաժինը տան իրենց։
