Ակնհայտ է, որ 4-5 տարի առաջ կամ ավելի վերջերս ընդամենը 1-2 լրատվամիջոց, կամ միայն հետաքննող լրագրողներին էին բարձրաձայնում կոռուպցիոն սխեմաների մասին, հիմա մամուլում շատացել են նման հրապարակումները։ Այս մասին «Առաջին լրատվական»-ի հետ զրույցում նշեց «Իմ քայլը» խմբակցության պատգամավոր Հերիքնազ Տիգրանյանը։
Նրա խոսքով, շատ են նաև իրավապահ մարմիններին դիմելու դեպքերը քաղաքացիների կողմից. «Վերջին շրջանում դիմումների ակտիվացումը հիմնավորում են իրավապահ մարմինների նկատմամբ ունեցած վստահությամբ, ինչը նշանակում է, որ ոչ թե նախկինում չեն եղել նման դեպքեր, այլ իրավապահ մարմինների, նրանց գործելաոճի հանդեպ չունենալով որևէ վստահություն, որ գործն արժանահավատ ելք կունենա, ուղղակի նրանք չեն դիմել իրավապահ մարմիններին»,-ասաց Տիգրանյանը։
Նա վկայակոչեց վարչապետ Նիկոլ Փաշինյանի խոսքը, որ թե Քննչական կոմիտեն, թե Հատուկ քննչական կոմիտեն աշխատում են գերծանրաբեռնված. «Մարդիկ հիշել են իրենց նկատմամբ տարիներ առաջ կատարված անարդարությունները, դրանք լինեն կոռուպցիոն բնույթի հանցագործություններ, թե ուղղակի իրավախախտումներ, որոնք այն ժամանակ անտեսել են, կամ վախեցել են տեղեկացնել։ Հիմա կամ վախի մթնոլորտն է բացակայում, կամ վստահությունն է աճել իրավապահ մարմինների հանդեպ, կամ երկուսը միասին»,-ընդգծեց Հերիքնազ Տիգրանյանը։