«Մեր առաջին ամենակարևոր խնդիրն այն է, որ կառավարությունն ինքը պետք է որոշի՝ որ կառուցվածքով ինքն ավելի լավ կաշխատի։ Սա մասսամբ նաև պայմանավորված է անձերով։ Որքան էլ մենք փորձենք ինստիտուցիոնալիզացնել և ասել, որ պետք է գնանք իդեալական կառուցվածքի, այդուհանդերձ, անձերն այս դեպքում նույնպես որոշակի դերակատարում ունեն, ովքեր կլինեն նախարարներ, ինչպես են իրենք աշխատում և այլն»,-«Առաջին լրատվական»-ի հետ զրույցում ասաց ԱԺ «Իմ քայլը» խմբակցության պատգամավոր, ԱԺ Տարածքային կառավարման, տեղական ինքնակառավարման, գյուղատնտեսության և բնապահպանության հարցերի մշտական հանձնաժողովի նախագահ Վարազդատ Կարապետյանը՝ անդրադառնալով Կառավարության կառուցվածքի մասին փոփոխությունների նախագծին։
Անդրադառնալով ԱԺ ԼՀԿ խմբակցության կառավարության կառուցվածքի այլընտրանքային տարբերակին՝ պատգամավորը նշեց, որ անիմաստ է՝ գործընկեր կուսակցությունների կողմից կառավարության կառուցվածքի իրենց մոդելների առաջարկը․ «Իրենք կարող են առաջարկել որոշակի փոփոխություններ առաջարկված տարբերակում, որովհետև կառավարությունն է ծրագիրն իրականացնելու և կառավարությունը իր ծրագիրն իրականացնելու համար այս տարբերակն ավելի համար է համարում»,-հավելեց նա։
Պատգամավորը անդրադարձավ այսօր ԱԺ-ում «Իմ քայլը» պատգամավորների և ընդդիմադիր խմբակցությունների պատգամավորների կռվին։ Նրա կարծիքով՝ եթե անգամ ընդդիմադիր որոշ գործիչներ փորձում են իշխանական խմբակցությանը ներքաշել այդ դաշտ, «Իմ քայլը» խմբակցությունը չպետք է այդ խայծը կուլ տար։
«Ինձ համար տհաճ էր այդ խոսակցությունը և անգամ տհաճ էր դահլիճում գտնվելը։ Ես մերժում եմ այդ ամենը»,-հավելեց նա։