Արգենտինայում ուսումնական տարվա մեկնարկի վրա կախվել է խափանման վտանգը. ուսուցիչները պահանջում են աշխատավարձի բարձրացում՝ սպառնալով գործադուլներով: Այս մասին հայտնում է ITAR-TASS-ը:
Խոշորագույն՝ Բուենոս Այրես նահանգի իշխանությունները չորեքշաբթի պաշտոնապես առաջարկել են փուլային երեքանգամյա ավելացում տարվա ընթացքում՝ մինչև 25 տոկոս, որն ուսուցիչներին չի գոհացրել: Մայրաքաղաքի ուսուցիչներին դա նույնպես չի գոհացրել, և նրանք պատրաստվում են 72-ժամյա գործադուլ անցկացնել հաջորդ շաբաթ, երբ պետք է սկսվեն պարապմունքները: Համանման իրավիճակ է նաև երկրի այլ տարածաշրջաններում:
Ուսուցիչների արհմիությունները պահանջում են, որպեսզի նրանց նվազագույն աշխատավարձը կազմի առնվազն 5000 պեսո (641 դոլար): Բացի այդ, նրանք 30 տոկոսանոց բարձրացում են պահանջում այս ամիս, հավելման հնարավորություն՝ տարվա կեսին:
Ուսուցիչների պահանջներն առաջադրվում են սղաճի ֆոնին: Միայն հունվարի սղաճի պաշտոնական մակարդակը կազմել է 3.7 տոկոս:
