Արարատի մարզի Արարատ քաղաքում երեկ ընտրությունների արդյունքներով կրկին վերընտրվել է գործող քաղաքապետը՝ Աբրահամ Բաբայանը՝ ստանալով քվեների ճնշող մեծամասնությունը՝ 5259: Իսկ նրա մրցակից, Արարատի նախկին քաղաքապետ Հակոբ Թովմասյանը, թեև ընտրություններից մեկ օր առաջ ինքնաբացարկ էր հայտնել և կոչ էր արել իր համակիրներին չմասնակցել ընտրություններին, սակայն նրա օգտին քվեարկողներ էլ են եղել. նա ստացել է 230 քվե: Արարատում քվեարկությանը մասնակցել է 5694 ընտրող, անվավեր է ճանաչվել 205 քվեաթերթիկ:
Հիշեցենք, որ Հակոբ Թովմասյանը նախընտրական պայքարը սկսելուն պես գործող քաղաքապետի դեմ դատախազություն գործ ուղարկեց՝ քաղաքապետին մեղադրելվով իր ստորագրությունը կեղծելու մեջ:
Դրա արդյունքում նա յուրացրել է մանկապարտեզի, պատկերասրահի շենքերը և մի շարք այլ հաստատություններ: Բայց, չգիտես ինչու, Հակոբ Թովմասյանը այդ մասին հիշել էր միայն իր թեկնածությունը առաջադրելուց հետո: Ի դեպ, նշենք, որ գործող քաղաքապետը մեզ հետ զրույցում նշեց, որ ինքը դատախազություն փաստեր կուղարկի, որով կապացուցի, որ նախկին քաղաքապետի մեղադրանքներն անհիմն են:
