Այսօր ԱԺ նիստերի դահլիճում ընթացել են Մարդու իրավունքներին նվիրված խորհրդարանական լսումներ: Մարդու իրավունքների և հանրային հարցերի մշտական հանձնաժողովի նախագահ Նաիրա Զոհրաբյանը «Առաջին լրատվական»-ի հետ զրույցում նշեց, որ լսումները կազմակերպվել են ՄԻՊ գրասենյակի, ՄԱԿ-ի հայաստանյան գրասենյակի և ԱԺ Մարդու իրավունքների և հանրային հարցերի մշտական հանձնաժողովի նախաձեռնությամբ: Ն. Զոհրաբյանն ընդգծեց, որ լսումներն ունեին հստակ օրակարգ, երեք ուղղություն էր ընդգրկված՝ դատաիրավական բարեփոխումները, հաշմանդամություն ունեցող մարդկանց խնդիրները և նրանց ինտեգրումը հասարակության մեջ, և երրորդ՝ երեխաների հիմնախնդիրները մանակատներում և այլ հաստատություններում:
Զոհրաբյանի խոսքով՝ հրավիրյալների կազմը չի որոշվել, հրավերներ միայն դեսպանատներ են ուղարկվել, հանձնաժողովի կայքում տեղադրվել է հայտարարություն, որ ովքեր զբաղվում են դատաիրավական խնդիրներով, հաշմանդամություն ունեցող անձանց և երեխաների խնդիրներով, կարող են մասնակցել խորհրդրանական լսումներին:
«Որևէ մեկի մտքով չէր կարող անցնել, որ «Իրավունքի կողմ» կոչվող ՀԿ ներկայացուցիչը կարող էր շեղվել օրակարգից»,- նշեց Ն. Զոհրաբյանը:
Հիշեցնենք՝ ԱԺ նիստերի դահլիճում ընթացող մարդու իրավունքների խնդիրներին նվիրված լսումների ժամանակ ամբիոնին մոտեցավ «Իրավունքի կողմ» ՀԿ ներկայացուցիչը, որը, պարզվեց, տրանսգենդեր է, և անդրադարձավ իրենց խնդիրներին: Նիստը վարող Մարդու իրավունքների և հանրային հարցերի մշտական հանձնաժողովի նախագահ Նաիրա Զոհրաբյանը հայտարարեց, որ իրավունք չունեին օրակարգ խախտել և նման հարց բարձրացնել ԱԺ ամբիոնից:
«Առաջին լրատվական»-ի հետ զրույցում Ն. Զոհրաբյանն ընդգծեց, որ դա ապտակ էր առաջին հերթին խորհրդարանական լսումներին և խորհրդարանին. «Ես շոկի մեջ եմ…»:
Մանրամասն՝ տեսանյութում:
