Վրաստանի նախկին նախագահ Միխեիլ Սահակաշվիլին պատրաստ է եղել հրաժարվելու ՆԱՏՕ-ին անդամակցելուց և Վրաստանի տարածքում թողնելու ռուսական ռազմակայանները՝ տարածքային ամբողջականության դիմաց: Այդ մասին նախկին նախագահը հայտարարել է ապրիլի 2-ին «Ռուսթավի 2» հեռուստաալիքին տված հարցազրույցում, հաղորդել է «Գրուզիա Online»-ը:
Հեռուստաընկերության գլխավոր տնօրեն Նիկա Գվարամիան, որը նախկին նախագահի հետ հարցազրույց է վարել Բրյուսելում, Սահակաշվիլիին հիշեցրել է Տոմա Չաղելիշվիլիի խոսքը՝ երկրի չորրորդ նախագահի մասին վավերագրական ֆիլմից. «Եթե վերադարձնեք տարածքները, մենք ամեն ինչից հրաժարվում ենք, այդ թվում՝ ՆԱՏՕ-ից: 2008 թվականի սկզբին ես ուղղակիորեն ասացի, որ հրաժարվում եմ նույնիսկ ՆԱՏՕ-ից, միայն վերադարձրեք տարածքները, եկեք խաղաղություն հաստատենք. այսինքն՝ Դուք պատրաստ էիք թողնելու թե՛ ռազմակայանները և թե՛ հրաժարվելու ՆԱՏՕ-ից՝ տարածքային ամբողջականության փոխարեն»,- հարցրել է Գվարամիան, ինչին նախկին նախագահը դրական պատասխան է տվել: «Ինձ համար գլխավորը երկիրն է… Մենք ժառանգություն ենք ստացել, ինչ որ ստացել ենք: Ռուսները եղել են (Վրաստանում) և նրանց դուրս անելն անհնարին էր, ուստի մենք առաջարկեցինք դա»,- նշել է Սահակաշվիլին:
