Վարչապետ Նիկոլ Փաշինյանը ներկայացրեց Հայաստանում գիտությունը զարգացնելու տեսլականը, այդ ուղղությամբ կառավարության առաջնահերթությունները, գիտակրթական հաստատությունների հետ համագործակցության ուղիները։ Վարչապետը վստահ է, որ Հայաստանում գիտությունը մեծ ներուժ ունի։ Սակայն այս ամենը մեր մոտ, կարծես թե, ավանդույթ է դարձել՝ գրեթե բոլոր ոլորտները մեծ ներուժ ունեն, բայց դրանք չենք կարողանում ամբողջությամբ կիրառել, գործնականի վերածել։
«Ընդհանրապես Հայաստանում ընդունված է, որ ամեն տարի այս շրջանում երկրի ղեկավարները այցելում են Գիտությունների ազգային ակադեմիա, և ամեն տարի հավի ու ձվի պատմությունն է, որ պետք է սկզբում գումարը տանք, հետո նոր արդյունքը ստանանք, թե պետք է արդյունք լինի, որ կարողանանք գումար տալ։ Երեկ վարչապետն էլ դա նշեց, որ եթե լավ գաղափարներ լինեն, միշտ հնարավոր է գումար գտնել։ Բայց ընդհանրապես կրթությունն ու գիտությունը մի կարևոր առանձնահատկություն ունեն՝ նրանք ածանցյալ են տնտեսությունից։ Աշխարհում չկա որևէ երկիր, որտեղ կա բարձր մակարդակի կրթություն ու գիտություն և տնտեսական վատ վիճակ։ Այո, գուցե մենք շատ լավ ներուժ ունենք, ես համաձայն եմ, որովհետև Խորհրդային միությունում Հայաստանը բնագիտական ուղղությունում շատ լավ ձեռքբերումներ է ունեցել, որը որոշակի իներցիայով այսօր էլ կա»,- «Առաջին լրատվական»-ի հետ զրույցում ասաց կրթության ոլորտի փորձագետ Սերոբ Խաչատրյանը։
Իսկ ԵՊՀ գիտաշխատող Հայկ Զաքարյանն ասաց․ «Երեկ տեղի ունեցավ մի բան, որը մինչ այդ տեղի չէր ունեցել։ Դա այն է, որ կառավարության կողմից ընդունվեց մի բան, որ իրենք պետք է հասկանան, թե ինչ են ուզում գիտությունից։ Այսինքն՝ իրենք ընդունում են, որ այս պահին պետք է հասկանան՝ գիտությունը ուր պետք է գնա։ Այսինքն՝ իրենք ընդունում են, որ այս պահին դեռ չեն պատկերացնում, բայց պետք է պատկերացնեն։ Շեշտում են նաև այն հանգամանքը, որ գիտնականները նույնպես պետք է հասկանան, թե ինչ են ուզում կառավարությունից»։
Մանրամասները՝ տեսանյութում։
