Այսօր Հայաստանի վարչապետը մեկնել է Բրյուսել, որտեղ հանդիպումներ է ունենալու Եվրամիության գրեթե բոլոր բարձրաստիճան պաշտոնյաների հետ։ Այցը հատկապես կարևոր է Հայաստանի արտաքին քաղաքական վերջին զարգացումների համատեքստում։ Նիկոլ Փաշինյանը Բրյուսել է մեկնում Թեհրան կատարած այցից անմիջապես հետո։ Իսկ Թեհրանում երկու երկրների ղեկավարները խոսեցին մի շարք խոշոր տնտեսական նախագծերի մասին, որոնք ուղղակիորեն և անուղղակիորեն առնչվում են նաև Եվրամիությանը։ Իրանում քննարկվել է Հայաստանի միջոցով գազի տարանցման հնարավարությունը, իսկ իրանական գազի վերջնական շուկան Եվրոպան է:
Թեմայի շուրջ «Առաջին լրատվական»- ի հետ քննարկմանը մասնակցեցին Գերագույն խորհրդի նախկին պատգամավոր Ազատ Արշակյանը, քաղաքագետներ Էդգար Վարդանյանը և Հայկ Սահակյանը:
Էդգար Վարդանյանի դիտարկմամբ՝ Երևան-Բրյուսել համագործակցությունը գործնական փուլ էր մտել ամիսներ առաջ. «Հիմա լուրջ արդյունքների արձանագրման փուլն է սկվում: Փաշինյանի բրյուսելյան այցից հետո կարող ենք շոշափելի արդյունքներ ունենալ»: Քաղաքագետի դիտարկմամբ՝ Հայաստանը արտաքին քաղաքականության հստակ կոնցեպցիա է որդեգել, և այս ամենի հիմքում հստակ տրամաբանություն կա:
Հայկ Սահակյանի խոսքով՝ Բրյուսելյան այցից ակնկալիքների սահմանը որոշողը Հայաստանն է դարձել, հատկապես, երբ ունի ինքնիշխանություն և կարողանում է դուրս գալ նախկին սահմանափակ վիճակից: Քաղաքագետի կարծիքով՝ Թեհրանից հետո Բրյուսել գնալը պատահական չէ. «Ընդհանրապես քաղաքականության մեջ պատահականություններ չեն լինում: Ընթացող գործընթացներում կարևոր է այն, որ Հայաստանի իշխանության արտաքին քաղաքականություն վարելու հիմքում ընկած է սեփական շահերի սպասարկման սկզբունքը:
«Շքամուտքից չստացվեց Եվրոպա մտնել, 2012-ին վերադարձանք, 2013-ի սեպտեմբերի 3-ին դեպի Եվրոպա տանող դարպասները շրխկացին և փակվեցին: Իսկ հիմա Հայաստանը հետնամուտքից մտնում է Եվրոպա առանց ապահարզան տալու ԵԱՏՄ-ին»,- ընդգծեց Ազատ Արշակյանը:
Մանրամասն՝ տեսանյութում:
Մանրամասն՝ տեսանյութում:
