Ֆինանսների փոխնախարարը հայտարարել է, որ Հարկային օրենսգիրքը դեռ չընդունված արդեն նախագծում փոփոխություններ են կատարվել. մասնավորապես, հրաժարվել են իրավաբանական, խորհրդատվական և հաշվապահական ծառայություն մատուցողներին ԱԱՀ-ով հարկելու գաղափարից, նրանք կվճարեն շրջանառության հարկ։ Հարկային օրենսգրքի փոփոխության հիմնական իմաստը, ըստ ԱԺ ԲՀԿ խմբակցության պատգամավոր Միքայել Մելքումյանի, այն է, որ խաղի կանոններ սահմանվեն երկարատև ժամանակահատվածի համար, որ ներդրողը իմանա, որ խաղի կանոնները չեն փոփոխվելու, ինչը մեզանում չի ստացվում։
«Այո՛, իրավաբանական, խորհրդատվական և հաշվապահական ծառայություններ մատուցողներին հարկելու հետ կապված մեծ աղմուկ էր բարձրացել, այսինքն՝ եթե աղմուկ չբարձրանար, մենք պետք է սխալ կամ ոչ էֆեկտիվ որոշում ընդունեի՞նք։ Սա կառավարման պետական համակարգի խնդիրներից մեկն է»,-«Առաջին լրատվական»-ի հետ զրույցում ասաց Միքայել Մելքումյանը։
Ինչ վերաբերում է Հարկային օրենսգրքի նախագծին, ապա, ըստ Մելքումյանի, այստեղ լրջագույն փոփոխություններ պետք է կատարվեն և բիզնեսի «մեսիջը» ճիշտ ընկալեն։
«Կարծում եմ՝ Հարկային օրենսգիրքը ուշանալու է, բայց ուշացնելը նորմալ չեմ համարում, պետք է արագ բերել, որպեսզի ներդրումներ գան։ Իսկ բիզնեսը սպասում է, տեսնի՝ ինչ ձևով է ընդունվելու, որ ակտիվանա, ներդրումներ անի։ Եվ հիմա սպասողական վիճակ է, ինչն աններելի է»,-հավելեց նա։
