Հնչեց մեղադրանք ռուսաստանցի պատգամավորների հասցեին, որոնք Ադրբեջանում ոչ բարեկամական հայտարարություններ են անում: Այս մասին «Առաջին լրատվական»- ի հետ զրույցում ասաց ԱԺ Արտաքին հարաբերությունների մշտական հանձնաժողովի նախագահ Հովհաննես Իգիթյանը՝ անդրադառնալով Հայաստանի Ազգային ժողովի նախագահ Արարատ Միրզոյանի՝ Ռուսաստանի Դաշնության խորհրդի լիագումար նիստում արված հետևյալ հայտարարությանը. «Ռուսաստանցի մեր որոշ գործընկերներ երեկ Բաքվում մասնակցել են վառ արտահայտված հակահայկական ակցիայի: Ավելին, արդարացի տարակուսանք է հարուցում, որ նրանցից ոմանք անգամ հայ-ռուսական միջխորհրդարանական հանձնաժողովի անդամ են»:
«Պաշտոնական Ռուսաստանը հայտարարում է, որ չի մասնակցել ակցիային և չի ճանաչում այն, ինչն Ադրբեջանը կոչում է Խոջալուի «ցեղասպանություն»»,- նշեց Հովհաննես Իգիթյանը՝ հավելելով, որ Կրեմլը նաև ասում է, որ իրենց հետ կապ չունի ռուսական մեդիադաշտի տեղեկատվական հակահայկականությունը, և որ դրանք քաղաքական, հասարակական առանձին գործիչների կողմից հնչող կարծիքներ են: «Բայց մենք հասկանում ենք, որ այդ մարդկանց պահվածքը կոորդինացված է»,- նշեց մեր զրուցակիցը:
«Մենք պետք է փորձենք Ռուսաստանի հետ հարաբերությունները կառուցել փոխադարձ բաց քաղաքականությամբ՝ սկսած վերևից: Իսկ ներքևները իներցիայով են գործում, չեմ բացառում նաև ադրբեջանական լոբբիստական գումարների դերակատարությունը»,- նշեց Իգիթյանը: Նա նաև ընդգծեց, որ Մոսկվայում բարձր մակարդակով ընդունելությունը, հարաբերությունները և հայտարարությունները տեղավորվում են բարեկամական կապերի տրամաբանության մեջ: «Հայ-ռուսական հարաբերությունները ձևափոխվում են, մի քիչ դժվար, բայց դառնում են չեմ կարող ասել հավասար հարաբերություններ, բայց արժանապատիվ»,- նշեց Իգիթյանը՝ հավելելով, որ Հայաստանին սկսել են ճիշտ հասկանալ:
Մանրամասն՝ տեսանյութում:
