ԱԺ նախագահ Արարատ Միրզոյանը փետրվարի 19-ին հայտարարել է, որ կողմ չէ կիսանախագահական կառավարման համակարգին վերադառնալուն: Մեկ տարում սահմանադրական հանրաքվե անցկացնելու և կիսանախագահական կառավարման համակարգին վերադառնալու առաջարկով հանդես էր եկել ՀԱԿ-ը: Ըստ Արարատ Միրզոյանի՝ պետք է առաջ գնալ և ամեն ինչ անել խորհրդարանական համակարգի կայացման համար:
Նախկին՝ կիսանախագահական համակարգին վերադառնալուն դեմ է նաև «Լուսավոր Հայաստանը»: Միաժամանակ արտախորհրդարանական տասը ուժեր պատրաստվում են համաժողովրդական հարթակ ստեղծել՝ միավորվելով «Նոր Սահմանադրություն» նախաձեռնության շուրջ: Այսպիսով՝ կողմ և դեմ բևեռներն ուրվագծվում են, մնում է հետևել, թե երբ և որտեղ կհանդիպեն այդ բևեռները: Թեմայի շուրջ «Առաջին լրատվական»- ի հետ քննարկմանը մասնակցեցին «Իմ քայլը» խմբակցության պատգամավոր Սոս Ավետիսյանը և «Լուսավոր Հայաստան» խմբակցության պատգամավոր Կարեն Սիմոնյանը:
Սոս Ավետիսյանի խոսքով՝ կիսանախագահական համակարգին վերադառնալը և արտահերթ ընտրություններ անցկացնելը սխալ կլինի՝ հաշվի առնելով քաղաքական զարգացումները. «Ուղղությունը շատ պարզ է. պետք է զարգացնել խորհրդարանական համակարգը»: Ս. Ավետիսյանի կարծիքով՝ սահմանադրական փոփոխությունների անհրաժեշտություն կա, բայց այս պահին դա հրատապ հարց չէ: Նրա խոսքով՝ ներկա Սահմանադրությունը բարելավման կարիք ունի, բայց ոչ հիմնովին ջնջելու:
Կ. Սիմոնյանի կարծիքով նույնպես սահմանադրական փոփոխություններ իրականացնելը ոչ առաջնային կարևորություն ունեցող օրակարգ է: Նրա խոսքով՝ ցանկացած համակարգային փոփոխություն ցնցում է. «Չարմատավորված խորհրդարանական համակարգը վերափոխելը, թեկուզ հետընթաց կատարելը բերելու է նրան, որ չենք ունենալու ո՛չ նորմալ խորհրդարանական, ո՛չ նորմալ կիսանախագահական համակարգ, ստացվելու է մուտանտ համակարգ, որտեղ որևէ մեկը ոչ մի բանի համար պատասխանատվություն չի կրելու: Կգրանցվի հետընթաց»: Կ. Սիմոնյանը նաև հավելեց, որ խմբակցությունների դերի բարձրացումը պահանջում է սահմանադրական փոփոխություններ. «Պետք է կարողանանք հասնել նրան, որ խորհրդարանը Սահմանադրության միջոցով ամրագրված ունենա առավել բարձր իրավունքներ»:
Մանրամասն՝ տեսանյութում:
