Օրերս առաջին ատյանի ընդհանուր իրավասության դատարանն արդարացրել է մահացած նորակոչիկ Նորայր Սահակյանի գործով չորս տարի ազատազրկման դատապարտված՝ զորամասի բաժանմունքի պետ, կոչումով լեյտենանտ Մհեր Դավիդյանցին, թերապևտիկ բաժանմունքի պետի ժամանակավոր պաշտոնակատար Արկադի Չախոյանին։ Հիշեցնենք, որ դատարանը այս գործով 4 տարվա անազատության էր դատապարտել չորս բժշկի՝ գինեկոլոգիական բաժանմունքի ավագ օրդինատոր, մայոր Կարեն Ջուլհակյանին, ՊԲ հավաքակետում բուժկետի պետ-բուժակ, ենթասպա Վարուժան Մանասյանին, Մհեր Դավիդյանցին և Արկադի Չախոյանին։
«ՀՀ անկախության հռչակման 22-րդ տարեդարձի կապակցությամբ համաներում հայտարարելու մասին» ՀՀ ԱԺ 03.10.2013թ. որոշման 4-րդ կետի 1-ին ենթակետի կիրառմամբ վերջիններիս ազատել են պատժից։
Հիշեցնենք, որ 2012 թ. դեկտեմբերի 21-ին Նորայրին, առանց որևէ առողջական խնդրի, Էրեբունու զինկոմիսարիատից զորակոչել են բանակ: Կենտրոնական հավաքակայանում վեց ներարկումներից հետո նրա ջերմությունը բարձրացել էր մինչև 38.3 աստիճան: Նորայրը մոտեցել էր հերթապահ բժշկին՝ հոսպիտալի բժիշկ Կարեն Ջուլհակյանին, որը գինեկոլոգ է, և ասել, որ ջերմություն ունի: Նորայրին մեկ հաբ տալով՝ ուղարկել էին Ղարաբաղ: Ճանապարհին Նորայրը դարձյալ վատ է զգացել, փսխել է, բայց նրան օգնություն չեն ցուցաբերել: Բանակում Նորայրին կարողացել են պահել 48 ժամ:
Նորայրի ծնողները դատարանի այս որոշման մասին իմացել են լրատվամիջոցներից։ Դատարանից որևէ ծանուցում չեն ստացել։ «Առաջին լրատվական»-ի հետ զրույցում Նորայրի հայրը՝ Նվեր Սահակյանը, պատմեց, որ վեց ամիս առաջ ծանուցում են ստացել, որ նիստ է լինելու, հետո հետաձգվել է դատը, և վեց ամիս անց այս որոշման մասին իմանում են լրատվամիջոցներից։
«Մեր իրավունքները լրիվ ոտնահարվել են։ Ես՝ որպես իրավահաջորդ, պարտավոր էի իմանալ այս նիստի մասին։ Դատավոր Մանուշակ Պետրոսյանը չգիտեմ ինչի հիման վրա է այս երկու ամբաստանյալներին անմեղ ճանաչել»,- ասաց Նվեր Սահակյանը։
Ծնողները հուսահատված են, խնդրում են հանդիպում վարչապետ Փաշինյանի հետ։ Նորայրի մայրը՝ Կարինե Սահակյանը, «Առաջին լրատվական»-ի հետ զրույցում նշեց. «Պարոն Փաշինյան, ես Ձեզ կսպասեմ անգամ իմ տանը, սա դաժան հեքիաթ է։ Խնդրում եմ, եթե դուք ուզում եք ունենալ նորմալ երկիր, եթե ուզում եք վերափոխել ամեն ինչ, սկսեք այստեղից»,- ասաց նա՝ հավելելով, որ այսպես չի կարելի թողնել։
Մանրամասն՝ տեսանյութում։
