Քաղաքական պասիվության պատճառը հենց քաղաքական ուժերի՝ պասիվ լինելու ցանկությունն է, ինչպես նաև վերևների ու ներքևների միջև անվստահությունը: Այսօր տեղի ունեցած մամուլի ասուլիսի ժամանակ ասաց «Իրավաբանների և հոգեբանների միջազգային ասոցիացիա» ՀԿ-ի նախագահ Խաչատուր Մարոզյանը:
«Եթե չկա փոխվստահություն՝ հաղթահարելու քաղաքական և տնտեսական ճգնաժամերը, ոչ մի խնդիր չի կարող լուծվել: Այսօր իշխանություններն ապրում են մեկ, ժողովուրդը՝ մեկ այլ հարթությունում: Միաժամանակ հարց է՝ ուզո՞ւմ են այս վիճակում փոփոխություն մտցնել քաղաքական ուժերը: Ակնհայտ է, որ ոչ. թե՛ իշխանությունը, և թե՛ ընդդիմությունը չեն ցանկանում որևէ բան փոխել: Այս երկրում որևէ բան փոխելու շահագրգռություն չունի քաղաքական և ոչ մի ուժ»,- ասաց նա՝ հավելելով, որ իշխանությունները նախընտրում է ստրուկ քաղաքացիական հասարակություն տեսնել:
Անդրադառնալով ընդդիմադիր չորս ուժերի՝ կուտակային կենսաթոշակային համակարգի դեմ միասնական պայքարին՝ խաչատուր Մարոզյանը նշեց, որ նրանց համախմբումը ձևական բնույթ է կրում: «Ո՞ւր է նրանց ուժը: Այդ ուժը պետք է լինի հասարակությունը: Իսկ նրանց հետևում ոչ ոք չկա»,- ասաց նա:
Ասուլիսի մյուս բանախոս, «Գլոսսա» իրավապաշտպան հասարակական կազմակերպության նախագահ Աշոտ Համբարձումյանն իր հերթին նկատեց, որ հայաստանյան կուսակցությունների միակ առաքելությունն աթոռ ստանալն է: «Քաղաքական ուժերն այսօր զբաղված են բացառապես իշխանության համար պայքար տալով, իսկ ժողովրդի մասին նրանցից ոչ մեկը չի մտածում»,- ասաց նա:
Խոսելով կենսաթոշակային պարտադիր կուտակային համակարգի դեմ պայքարող ուժերի մասին՝ՀԿ-ի ղեկավարը հույս հայտնեց, որ սա 4 կուսակցությունների հերթական PR-ի հարց չէ: «Հույս ունեմ, որ նրանց պայքարը շարունակական բնույթ կկրի, և պարտադիր կուտակայինի դեմ պայքարում կներառվեն նաև ՀԿ-ները: Այս պահին այդ 4 ուժերին կոչ եմ անում պայքարել մինչև վերջ»,- ասաց Աշոտ Համբարձումյանը:
«Գլոսսա» իրավապաշտպան ՀԿ-ի ղեկավարը հիշեցրեց, որ Հայաստանում արտագաղթն ահռելի չափերի է հասել: «Մտածում եք, որ Ռուսաստանում օրենքների խստացումից հետո հայաստանցիները հայրենի՞ք են վերադառնալու: Ամենևին ոչ: Նրանք կա՛մ պարզեցված ընթացակարգով ՌԴ քաղաքացիություն են ստանալու, կա՛մ պարզապես տեղափոխվելու են Եվրոպա»,- ասաց նա:
