«Ով է ուզում դառնալ միլիոնատեր» հեռուստանախագծի գլխավոր խմբագիր Իլյա Բեռը հայտարարել է, որ «Ի՞նչ, որտե՞ղ, ե՞րբ»-ի գիտակ Ալեքսանդր Դրուզը փորձել է իրենից ստանալ հարցերի ցուցակը, որոնք պետք է հնչեին հաղորդման ժամանակ: Այս մասին Բեռը գրել է LiveJournal-ի իր բլոգում:
Բեռի խոսքերով, անցած տարվա նոյեմբերին Դրուզն առաջարկել է բացահայտել հարցերի ցանկը՝ երեք միլիոն շահույթից մասնաբաժնի դիմաց: Բեռը պնդում է, որ Դրուզին հարցերի ցուցակը տվել է խարդախության փաստն ապացուցելու համար, սակայն վերջին հինգը անծանոթ է եղել գիտակին: Արդյունքում, Դրուզն ու նրա հետ խաղացող գիտակ Վիկտոր Սիդնևը հասել են վերջին հարցին, չեն կարողացել պատասխանել և որպես մրցանակ 200 հազար ռուբլի են ստացել:
Որպես ապացույց Բեռը մի քանի հրապարակում է արել, որոնցում, ինչպես պնդում է նա, Դրուզի հետ զրույցների ձայնագրություններն են:
Պատասխանելով մեղադրանքներին՝ Դրուզն ասել է, որ ձայնագրություններն իսկապես իրեն են պատկանում, սակայն պատմությունն այլ կերպ է եղել։
«Հենց նա է ինձ գումարի դիմաց հարցերի հետ կապված գործարք առաջարկել, որը ես պետք է վճարեի նրան շահած գումարից»,-ասել է Դրուզը։
Նա հավելել է, որ իրեն հիացրել է Բեռի հանդգնության մակարդակը, և ինքը որոշել է պարզել, թե որքան հեռու նա կարող է գնալ։
«Եվ մարդը հեռուն գնաց՝ սկսեց քննարկել գործարքի մանրամասները»,-եզրափակել է Դրուզը։
