Կիևում Ուկրաինայի ընդդիմության առաջնորդները հանդիպել են ԵՄ ընդլայնման և հարևանության քաղաքականության հարցերով գերագույն հանձնակատար Շտեֆան Ֆյուլեի հետ և քննարկել են Ուկրաինան քաղաքական ճգնաժամից դուրս բերելու ուղիները: Այս մասին հաղորդում է RIA Novosti-ն՝ վկայակոչելով «Բատկիվշչինա» ընդդիմադիր կուսակցության մամլո ծառայությունը:
Հանդիպումը տեղի է ունեցել երեքշաբթի ուշ երեկոյան այն բանից հետո, երբ Ֆյուլեն ժամանել է Կիև: Սա նրա երրորդ այցն է Ուկրաինա վերջին երեք շաբաթվա ընթացքում: Հանդիպմանը մասնակցել են «Բատկիվշչինա» խորհրդարանական խմբակցության առաջնորդ Արսենի Յացենյուկը, ՈՒԴԱՌ, «Սվոբոդա» կուսակցությունների առաջնորդներ Վիտալի Կլիչկոն և Օլեգ Տյագնիբոկը:
Յացենյուկի խոսքով՝ եվրոպացի գործընկերների հետ քննարկվել է Ուկրաինայի նոր սահմանադրությունը, նախարարների կաբինետի նոր կազմը, գործողությունների նոր ծրագիրը և նոր տնտեսական ծրագիրը:
