Պարտադիր կուտակային կենսաթոշակային համակարգի դեմ պայքարը խորանում է` ներառելով նոր խմբերի: Փետրվարի 12-ին բողոքի ակցիայի էին դուրս եկել Երևանի մետրոպոլիտենի աշխատակիցները: Վերջիններս դիմում-բողոք էին պատրաստել, այն ներկայացրին ղեկավարությանը, խոստացան արձագանքների մասին տեղեկացնել: Մետրոպոլիտենի աշխատակից Անդրանիկ Գևորգյանը «Առաջին լրատվական»-ի հետ զրույցում նշեց, որ իրենք ֆոնդեր չեն ընտրել, տեղյակ չեն եղել ոչնչից, և հիմա ստացել են աշխատավարձերը` արդեն պահումներով: «Մեզ տեղյակ չեն պահել, մենք բողոքի ակցիա ենք անում: Եթե իրենք չկարողացան մեզ օգնել, կգնանք քաղաքապետարան, հետո վերև, պայքարելու ենք` մինչև պարտադիր բաղադրիչը հանեն ու մեր փողերը հետ տան: Մենք ուզում ենք` մեր իրավունքները չսահմանափակեն, ամեն ինչ լինի կամավոր»,- ասաց նա:
Պայքարողներին էին միացել նաև Դեմ եմ նախաձեռնության անդամները, ովքեր նշում էին, որ ընդդեմ կուտակային կենսաթոշակային համակարգի պայքարը գնալով ընդլայնվում է: «ՍԴ որոշումից հետո ակնհայտ է դառնում, որ գործատուն աշխատողից որևէ պահում կատարել իրավասու չէ, կանխատեսելի էր, որ նրանք ընդվզելու են: Կարծում եմ` էֆեկտն այն ժամանակ է լինում, երբ մարդ իր մաշկի վրա է զգում հետևանքները, նաև տեղեկատվության պակաս կար, շատերը չգիտեին` ինչ է տեղի ունենալու, այս պահին աշխատավարձերը ստացել են` կրճատված, հասկացել են` ինչ է կատարվում, բացի այդ, նաև եղանակն է տաքանում ու գնալով ավելի տաքանալու է»,- ասաց Դ!եմ եմ նախաձեռնության անդամ Արսեն Մանուկյանը: Վերջինիս խոսքով` արդեն միտում կա ընդդեմ կուտակայինի համազգային շարժման, իսկ եթե Կառավարությունը ականջալուր չլինի քաղաքացիների պահանջներին, պոտենցիալը կա, որ այն կվերաճի համազգային գործադուլի:
Մետրոպոլիտենի աշխատակիցները նշում են, որ նախապես որոշված էր էլ ավելի մեծ թիմով դուրս գալ ակցիայի, սակայն ղեկավարության կողմից որոշակի ճնշումների հետևանքով ոչ բոլորն են միացել պայքարողներին: Հունվար ամսվա աշխատավարձը ստանալով` նրանք հայտնաբերել են, որ կուտակային պահումներն, անկախ ՍԴ որոշումից, արված են. գործադուլի որոշում իրենք դեռ չունեն, սակայն չեն էլ բացառում դրա հավանականությունը: Մետրոպոլիտենի աշխատակիցները պատրաստակամ են պայքարել մինչև վերջ, հասնել անգամ քաղաքապետարան ու էլ ավելի բարձր ատյաններ:
