ԱՄՆ նախկին պետքարտուղար Ջոն Քերին ամերիկյան CNN հեռուստաընկերության եթերում քննադատել է նախագահ Դոնալդ Թրամփի երկամյա պաշտոնավարումը:
Քերին, որն աշխատել է Բարաք Օբամայի նախագահության օրոք, հայտարարել է, որ Թրամփը «մեկուսացրել է» Միացյալ Նահանգներև ու երկիրը ետ մղել անցյալ:
«Այս նախագահը բանակցություններ չի վարում: Այս մարդը հավակնում է աշխարհի մեծագույն բանակցողի կոչմանը: Որտե՞ղ են այդ բանակցությունները»,- հեգնել է Քերին:
Քերին հիշեցրել է, որ Թրամփը դուրս է եկել Անդրխաղաղօվկիանոսյան գործընկերությունից, Փարիզի կլիմայի պայմանագրից, Իրանական միջուկային գործարքից:
Շարունակելով քննադատել Դոնալդ Թրամփին, Քերին ԱՄՆ նախագահին մեղադրել է Ռուսաստանի նախագահ Վլադիմիր Պուտինին ընդունելու պատրաստակամության համար:
«Սա ամոթալի պահ է»,- նշել է Քերին:
Քերին կարծում է, որ Միացյալ Նահանգներում ժողովրդավարությունը վտանգված է, իսկ կառավարությունը «shutdown»-ի պատճառով չի կարողանում բնականոն աշխատել: Նրա խոսքերով, Թրամփի միջազգային քաղաքականությունը չի աշխատում ԱՄՆ շահերի օգտին:
