Կինոռեժիսոր Հովհաննես Գալստյանն արդեն 10 օր է՝ հացադուլ է իրականացնում Մատենադարանի հարակից տարածքում։ Այսօր նրան այցելել է մշակույթի նախարարի պաշտոնակատար Լիլիթ Մակունցը՝ հորդորելով Գալստյանին դադարեցնել հացադուլը։
Գալստյանն «Առաջին լրատվական»-ի հետ զրույցում ասաց, որ մշակույթի նախարարի պաշտոնակատարի հետ արդեն սկսել են բանակցել իր առաջադրած կոնկրետ պահանջների շուրջ և նախարար Մակունցի հետ մեկ-երկու հանդիպումով հնարավոր կլինի ավարտել բանակցությունները և կնքել գրավոր համաձայնություն։
Գալստյանն ասաց, որ նախարարի պաշտոնակատարը ծանոթ չէր խնդրին, իսկ խնդրի մի մասով էլ ապատեղեկացված էր։
Հիշեցնենք, որ խնդիրն այն է, որ 2018-ին ավարտվում է «Պարալլելս Ֆիլմպրոդաքշն» կինոընկերության «Տատիկիս վարսերը» միջազգային կինոնախագծի հանդեպ Հայաստանի ազգային կինոկենտրոնի ստանձնած պարտավորության կատարման ժամկետը։
Կինոկենտրոնը 2016-ին ամբողջովին կատարել է իր պարտավորությունը՝ աջակցելով նախագծի զարգացմանը։ 2017-ի ապրիլին մշակույթի նախկին նախարար Արմեն Ամիրյանի հրահանգով՝ ֆիլմի համար նախատեսված գումարի մի մասը ժամանակավորապես փոխանցվել է Հայաստանի ֆիլմ հանձնակատարին նախարարության հրատապ այլ ծախսերի համար՝ հուլիսին վերադարձնելու պայմանով։ Գումարը չի վերադարձվել, ինչի արդյունքում ֆիլմի արտադրության պլանը խափանվել է, արտադրող ընկերությունը կուտակել է պարտքեր։ 2018-ին կինոկենտրոնը ընդունել է նոր կանոնակարգ, որով, խախտելով օրենքը՝ չեղարկել է իր կողմից երեք տարի առաջ ստանձնած ֆիլմը ֆինանսավորելու պարտավորությունը։
Ֆիլմի արտադրությունը դադարեցվել է, միջազգային արտադրողների ներդրումները՝ սառեցվել։ «Պարալլելս Ֆիլմպրոդաքշն» կինոընկերությանը հասցվել է բարոյական, ֆինանսական և արտադրական մեծ վնաս։ Ընկերությունը դատական հայց է ներկայացրել ընդդեմ ազգային կինոկենտրոնի։ Մինչև 2018-ի ավարտը, կինոկենտրոնի կողմից ստանձնած պարտավորության կատարման երաշխիքների բացակայության դեպքում, ֆիլմի միջազգային ներդրողները հավելյալ հայց կներկայացնեն ընդդեմ Հայաստանի Հանրապետության՝ պահանջելով իրենց ներդրած գումարների և կրած վնասների փոխհատուցում։
«Ի նշան ՀՀ պետական կառույցների կողմից իմ՝ ֆիլմարտադրողի ստեղծագործելու իրավունքի իրականացումը խոչընդոտելու փաստերի դեմ բողոքի, ես՝ Հովհաննես Գալստյանս, ելնելով սրանից՝ երեք պահանջ եմ առաջ քաշել․
1. «Տատիկիս վարսերը» Հայ-բուլղար-գերմանական համատեղ կինոնախագծի հանդեպ ազգային կինոկենտրոնի ստանձնած պարտավորությունների կատարման երաշխիքներ,
2. «Տատիկիս վարսերը» կինոնախագծից 2017-ին վերցրած գումարի վերադարձ,
3. «Պարալլելս Ֆիլմպրոդաքշնի» հայտերի հանդեպ ապօրինի որոշման չեղարկում։
«Այս հացադուլը հանդիսանում է Հայաստանում մշակույթի ոլորտում տասնամյակներով կուտակված արատավոր երևույթները հրապարակայնացնելու և կինոյի կառավարման համակարգը բարեփոխելու համար անզիջում պայքարի առաջին փուլը։ Ես մինչև վերջ տանելու եմ այս պայքարը։ Մենք ձևավորելու ենք կինոարտադրողների բևեռ, որն ազդելու է կինոյի պետական կառավարման վրա»,- ասաց Գալստյանը։
Նշենք, որ երեկ Գալստյանին այցելել է նաև ՀՀ նախագահ Արմեն Սարգսյանը, որը մի գաղտնիք է պատմել կինոռեժիսորին, ինչն էլ ավելի է մոտիվացրել նրան շարունակելու իր պայքարը։
Առավել մանրամասն՝ տեսանյութում։
