Սուրբ Ծննդյան տոների ժամանակ Գերմանիայում կենդանիների համար նախատեսված կացարաններում կենդանիներ չեն տա: Այս մասին հաղորդել է Deutsche Welle-ն:
Կենդանիների կացարանների ղեկավարների կարծիքով, Սուրբ Ծննդյան տոներին, կենդանիներ չի կարելի նվիրել: «Լավագույն դեպքում կենդանիները դառնում են ընտանիքի անդամներ, բայց ոչ ոք ընտանիքի անդամին որպես նվեր չի տալիս»,- բացատրել է Հանովերի կացարաններից մեկի աշխատակից Առվիդ Պոսեկելը:
Կացարաններում անհանգստանում են, որ Սուրբ Ծննդյան տոներին չկողմնորոշվելով նվերի հարցում հաճախ կենդանիներ են նվիրում՝ առանց խորհրդակցելու հարազատների հետ: Արդյունքում, տոներից հետո, կենդանիներին կամ հետ են վերադարձնում կամ, ընդհանրապես, դրանք հայտնվում են փողոցում:
Կացարանների աշխատակիցները բացատրել են DW-ին, որ նրանք, ովքեր իսկապես ուզում են կենդանի նվիրել Սուրբ Ծննդյան տոներին, կարող են գալ տոներից մի քանի շաբաթ առաջ կամ հունվարին: «Պարտադիր չէ դա անել տոներից երկու օր առաջ»,- բացատրել է Բրեմենի կենդանիների կացարանի աշխատակից Գաբրիելե Շվաբը:
Բացի դրանից, զրուցակիցները նշել են, որ նախատոնական շրջանը մարդկանց համար անհանգիստ ժամանակ է, իսկ կենդանիների համար, որոնք նոր են հայտնվում տանը, դա իսկապես սթրեսային է:
Արգելքը կգործի դեկտեմբերի 15-ից մինչև հունվարի 1-ը, ոչ միայն Հանովերում և Բրեմենում, այլև Բեռլինում և այլ խոշոր քաղաքներում:
