Թուրքիայի ռազմածովային ուժերի շուրջ սկանդալի հետաքննության նախնական արդյունքներով` ռազմական կապի TAFICS կոչված թուրքական ծածկագրերը վաճառվել են այլ երկրների: Ինչպես գրել է թուրքական Zaman թերթը, պարզվել է, որ վաճառքի մասնակիցները շանտաժի միջոցով կարևոր փակ պետական տեղեկություն են քաղել բարձրաստիճան սպաների և չինովնիկների մասին` արտասահմանյան հետախուզությանը վաճառելու նպատակով:
TAFICS (թուրքական զինված ուժերի կապի կոմպլեքսային համակարգ) ծածկագրերը, որոնք նախատեսված են պատերազմի ժամանակ օգտագործելու համար, հայտնաբերվել են կասկածվողներից մեկին պատկանող համակարգչում: Անուններ չհիշատակելով` ոստիկանները Zaman-ին հայտնել են, որ ծածկագրերի կողքին նշված է եղել երկու երկրի անվանում: Հայտնի է միայն, որ նրանցից մեկը ընդհանուր սահման ունի Թուրքիայի հետ: Ներկա պահին համապատասխան կառույցները հետաքննում են` արդյոք գաղտնի տեղեկությունն արդեն վաճառվել է, թե ոչ:
Ավելի վաղ TAFICS ծածկագրերը հայտնաբերվել էին «Էրգենեկոն»-ի գործով պետական հեղաշրջման մեջ կասկածվողի մոտ, որը ներկա պահին կանգնած է դատարանի առաջ: Վերջերս թուրքական դատախազությունը նաև հայտնաբերել է, որ Թուրքիայում հայտնի լրտեսական ավազակախմբի կողմից անվտանգության առանցքային հարցերով կարևոր տեղեկություն է վաճառվել արտասահմանյան հետախուզությանը:
