«ՄԻԵԴ-ի կողմից յուրաքանչյուր հարցի վերաբերյալ խախտում հայտնաբերել կամ չհայտնաբերելը մտահոգվելու հարց չէ։ Այնպիսի երկիր չկա, որի վերաբերյալ խախտում չլինի։ Ընդամենը պետք է ուշադիր լինել, որ հետագայում այդ ամենը ուղղվի»,- «Առաջին լրատվական»-ի հետ զրույցում ասաց ՄԻԵԴ-ում ՀՀ դատավոր, նախկին ՄԻՊ Արմեն Հարությունյանը։
Հարությունյանն ասաց, որ ՄԻԵԴ-ում Մարտի 1-ի գործով ինքը դատավորների կազմում չէ, քանի որ ՄԻԵԴ կանոններով՝ եթե ներկայացուցիչը նախկին գործունեության բերումով ինչ-որ կերպ առնչություն է ունեցել գործին, կազմում չի ընդգրկվում. «Դրա համար Մարտի 1-ի գործի մասով ոչինչ չեմ կարող ասել։ Բայց եթե խախտում է արձանագրվել որևէ գործով, դա պետք է շտկվի»։
Մեր դիտարկմանը՝ չի՞ կարծում, որ եթե ժամանակին քաղաքական հրահանգ չիջեցվեր, և Մարտի 1-ի գործերով քաղաքական որոշումներ չկայացվեին, ներկայումս այս պատկերը չէր լինի, մեր զրուցակիցն արձագանքեց. «Ես տենց բաները չեմ կարող մեկնաբանել, մանավանդ որ՝ կազմի մեջ չեմ եղել։ Չեմ կարող ասել՝ քաղաքական ենթատեքստ եղել է, չի եղել։ Եվրոպական դատարանը քաղաքական ենթատեքստով չի կողմնորոշվում, այլ կոնկրետ կոնվենցիայի մասով խախտումներ է արձանագրել»։
Արմեն Հարությունյանը խուսափեց խոսել նաև սխալ որոշում կայացրած դատավորներին պատասխանատվության ենթարկելու մասին՝ նշելով, որ դա երկրի ներքին գործն է: «Երբ ես ՄԻՊ էի, այդ բաների մասին կարող էի խոսել, իսկ որպես ՄԻԵԴ դատավոր՝ ես չեմ կարող այդ հարցերի մասով գնահատական հնչեցնել»,- ասաց Արմեն Հարությունյանը։
