«Մենք թիմով որոշեցինք, որ բոլորս՝ «Իմ քայլը» դաշինքի նախարարները և փոխվարչապետները, կառաջադրվենք որպես պատգամավորի թեկնածու»,- «Առաջին լրատվական»- ի հետ զրույցում նշեց Սփյուռքի նախարարի պաշտոնակատար Մխիթար Հայրապետյանն, ով ռեյտինգային ընտրակարգով որպես պատգամավորի թեկնածու է առաջադրվել թիվ մեկ ընտրատարածքում:
Անդրադառնալով դիտարկմանը, որ «Իմ քայլը» դաշինքի քարոզարշավի մեկնարկը վարչապետն սկսել է Գյումրիից, Սփյուռքի նախարարի պաշտոնակատարը նշեց, որ դա լոկալ պրոցես է. «Յուրաքանչյուր թեկնածու, անկախ զբաղեցրած պաշտոնից, քարոզարշավ է իրականացնելու այն ընտրատարածքում, որտեղ առաջադրվել է: Ես թիմային քարոզարշավին չեմ մասնակցելու, բացառապես կենտրոնացած եմ առաջին ընտրատարածքում քարոզարշավ իրականացնելու վրա»:
Անդրադառնալով հարցին, թե վարչապետի աջակցության կարիքը կզգացվի թե ոչ, Մ. Հայրապետյանը նշեց, որ վարչապետի մակարդակով ուղիղ աջակցություն որևէ մեկին չի ցուցաբերվի, քանի որ դա կխախտի հավասարության սկզբունքը. «Ինչ վերաբերում է վարչապետի գործոնին, այն շատ ուժեղ է, հանրությունը նախևառաջ իր վստահությունը տալիս է Նիկոլ Փաշինյանին, հետո նոր ռեյտինգային ընտրակարգով առաջադրված թեկնածուին»:
Մ. Հայրապետյանի խոսքով՝ մերժողական քաղաքականության էջը փակված է. «Եթե երկրի կառավարումը վստահվեր միայն այն մարդկանց, ովքեր ի սկզբանե հավատացել էին գաղափարին, ապա դա մեր կողմից անպատասխանատու քայլ կլիներ:
Հեղափոխությունը որևէ մեկը չի կարող սեփականաշնորհել: Հեղափոխությանը մասնակցել է միլիոնից ավելի մարդ, և այդ մարդկանցից են մեր քաղաքական թիմակիցները, որոնք ընդունում են մեր սկզբունքները: Մերժողականությունը մեզ հարիր չէ»:
«Հույս ունեի, որ նոր ԸՕ-ն կընդունվեր, և կկարողանայինք քաղաքական նոր մշակույթի, քաղաքական դեբատների դաշտ մտնել, և պայքարը կլիներ ոչ թե ռեյտինգային ընտրակարգով առաջադրված թեկնածուների միջև, այլ կլիներ բացառապես քաղաքական ասելիքի ու խոսքի պայքար: Ցավում եմ, որ մեզ չհաջողվեց դա անել»,- ընդգծեց Մ. Հայրապետյանը:
Մանրամասն՝ տեսանյութում:
