Մենք ապրում ենք շատ կարևոր և հետաքրքիր մի ժամանակաշրջանում, երբ ամեն օր տեղի են ունենում իրադարձություններ, որոնք իրենց հետքն են ունենալու պատմության մեջ։ Բայց պատմության ամենակարևոր դասն այն է, որ պատմությունից, սովորաբար, դասեր չեն քաղում։
Ի՞նչն է պատճառը, որ մարդիկ, հասարակությունը, քաղաքակրթությունները պատմությունից դասեր չեն քաղում, և ամեն ինչ կրկնվելու տենդենց, միտում ունի «Առաջին լրատվական»-ի հարցին պատմաբան Դավիթ Թինոյանը պատասխանեց․ «Սովորաբար պատմությունից դասեր չեն քաղում այն հասարակություններում, որտեղ լինում է մտքի ճգնաժամ, ավելի կոնկրետ՝ հումանիտար մտքի ճգնաժամ։ Գաղտնիք չէ, որ հումանիտար գիտելիքի, հումանիտար գիտությունների նկատմամբ վերաբերմունքը թե՛ պետության կողմից, թե՛ հասարակության կողմից դրան վերապահված է երկրորդական, երրորդական դերակատարում։ Այդ պարագայում, երբ հասարակությունը չի հետաքրքրվում իր սեփական պատմությամբ, էլ չեմ ասում՝ համաշխարհային պատմությամբ։ Նմանատիպ երևույթ հասարակությունում մենք շատ ենք տեսնում, երբ հասարակությունը իր իսկ կատարած սխալների վրա չի կարողանում եզրահանգումների գալ և ուղղել ու ճիշտ ճանապարհով ընթանալ»։
Պատմաբանը նաև հավելեց․ «Ռացիոնալ որոշումներ կայացնելու կարողությունը կապված է, այնուամենայնիվ, գիտելիքի հետ։ Այսինքն՝ մարդ պետք է գիտելիք ունենա, որ կարողանա վերլուծության ենթարկի նաև ընթացիկ տնտեսական, քաղաքական պրոցեսները, համադրի անցյալում տեղի ունեցած պրոցեսների հետ և գա եզրահանգման։ Այսինքն՝ կարողանա վերլուծել։ Եթե մարդը ծանոթ չէ կամ ծանոթ է մակերեսայնորեն, կամ սովետական գիտելիքի պրիզմայով է դիտարկում, այդ դեպքում չի կարող ճիշտ վերլուծություններ կատարել»։
Ամբողջությամբ՝ տեսանյութում։
