Բանակը մատուռ է, ուր պետք է մաքրենք մեր հոգիներն ու պատրաստվենք հայրենիքի պաշտպանությանը: Այսօր տեղի ունեցած մամուլի ասուլիսի ժամանակ այս մասին ասաց «Արաբո» ջոկոտի հրամանատար Մանվել Եղիազարյանը՝ հավելելով, որ բանակը հայ ժողովրդի պատիվն է:
«Մեր բանակն այսօր պետք է կարողանար համեմատվել ամերիկյան, աշխարհի մյուս հզոր բանակների հետ: Սրա մասին ես միշտ եմ երազել: Ես մարտում ապացուցել եմ, որ պատրիոտ եմ, և եթե հայրենիքին պետք լինի իմ կամ որդուս պաշտպանությունը, մենք պատրաստ ենք մարտի դաշտ գնալ»,- ասաց նա՝ հավելելով, որ հայ տղամարդն ի ծնե զինվոր է:
Մանվել Եղիազարյանի խոսքով՝ ինքը չի զարմանում ադրբեջանական դիվերսիոն գործողության հետևանքով զոհված Արմեն Հովհաննիսյանի խիզախության վրա, քանի որ նման հերոս տղաներ հայ ազգը ծնել ու միշտ էլ ծնելու է: «Մենք պատերազմելուց բացի այլ ճանապարհ չունենք. կա՛մ պետք է գաղթենք, կամ տղամարդավարի կանգնենք, պաշտպանենք մեր հայրենիքը: Բոլորս պետք է միասնական հարված հասցնենք թշնամուն:
Իհարկե, նախկին բարոյահոգեբանական վիճակը չես համեմատի ներկայիս վիճակի հետ: Այն ժամանակ մեր ոգին թևածում էր ամենուր: Այսօր բարոյահոգեբանական պատշաճ մթնոլորտի վերականգնումը հրամայական է դարձել»,- ասաց նա:
«Արաբո» ջոկատի հրամանատարը զայրույթ հայտնեց, որ սահմանին տիրող վիճակի մասին անընդհատ իրարամերժ տեղեկություններ են ստացվում: «Գյուղապետերն ասում են՝ ամեն բան կարգին է, մյուս կողմից էլ ասում են՝ սահմանին վիճակը խիստ լարված է: Մի՞թե պետությունը չի կարողանում նկարահանող խմբեր գործուղել սահման, որ հստակ տեղեկություններ ունենանք: Կամ կամավորների, ովքեր կգնան, «դուխ կտան» սահմանամերձ գյուղերի բնակիչներին, զինվորի հետ հավասար կմտնեն խրամատ ու կմարտնչեն»,- ասաց Մանվել Եղիազարյանը:
Ասուլիսի մյուս բանախոս, «Արաբո» ջոկատի անդամ Նվեր Ստեփանյանն իր հերթին նկատեց, որ իրական մարտիկը անգամ մեկ ձեռքով կարող է կռվել: «Կռվողը կկռվի. դա միշտ էլ այդպես է եղել»,- ասաց նա:
Լուսանկարը` PanARMENIAN Photo-ի
