ՆԱՏՕ-ն 2015 թվականի հունվարի 1-ից կանցնի Աֆղանստանում նոր՝ «Վճռական աջակցություն» ծածկանվամբ ռազմական առաքելության իրականացմանը, որը կզբաղվի անվտանգության աֆղանական ուժերին նախապատրաստելով և աջակցություն ցուցաբերելով՝ առանց մարտական գործողությունների անցկացման: Այս մասին հայտնել է ՆԱՏՕ-ի Զինվորական կոմիտեի ղեկավար Կնուդ Բարտելսը՝ փոխանցում է ITAR-TASS-ը:
«ՆԱՏՕ-ն ներկայում աշխատում է աֆղանական իշխանությունների հետ «Վճռական աջակցություն» առաքելության իրավական բազայի ստեղծման վրա»,- ասել է Բարտելսը՝ Բրյուսելում բացելով ՆԱՏՕ-ի 28 անդամ երկրների գլխավոր շտաբների պետերի երկօրյա հանդիպումը:
Նրա խոսքով՝ հանդիպման մասնակիցները պետք է քննարկեն Աֆղանստանում ընթացիկ խաղաղապահ օպերացիայի ընթացքը և նոր առաքելության գործարկման պլանները, ինչպես նաև անվտանգության հարցերը՝ կապված երկրի նախագահի առաջիկա ընտրությունների հետ:
Արևմտյան ԶԼՄ-ների տվյալներով՝ ՆԱՏՕ-ն ծրագրում է Աֆղանստանում թողնել 12 հազար զինվորական:
