Հայաստանցի ծանրորդ Սիմոն Մարտիրոսյանը պատմական արդյունք գրանցեց Թուրքմենստանում տեղի ունեցած աշխարհի առաջնությունում: Հիշեցնենք, որ երեկ 109 քաշային կարգում մեր ծանրորդը երկամարտում ցույց տալով 435 կգ արդյունք նվաճեց աշխարհի չեմպիոնի տիտղոսը: Մեր ծանրորդը ցուցադրելով ֆանտաստիկ ելույթ՝ հրում վարժություն և երկամարտում գրանցեց համաշխարհային ռեկորդ:Հրում ձևում նա բարձրացրեց 240 կգ: Մարտիրոսյանը աշխարհի ռեկորդ էր գրանցել նաև հրում ձևում, սակայն մրցավարները նրա բարձրացրած 197 կգ-ը չգիտես ինչու չհաշվեցին:Նշենք, որ Հայաստանի ներկայացուցիչների 8 տարի չէր հաջողվում նվաճել աշխարհի չեմպիոնի կոչումը:
Այս քաշային կարգում երկամարտի նախկին ռեկորդը 424-կգ էր ու փաստորեն Մարտիրոսյանը համաշխարհային ռեկորդը գերազանցեց 11կգ-ով, ինչը կարելի է բացառիկ արդյունք համարել: Հրում ձևում էլ նախկին ռեկորդը 237 կգ էր: Հատկանշական է, որ Մարտիրոսյանը 240 կգ-ը վստահ բարձրացրեց և ակնհայտ էր, որ հայ ծանրորդը կարող էր մի քանի կգ-ով ավելի ծանր ծանրաձող հրել: Միջազգային լրատվամիջոցները Մարտիրոսյանի ելույթը որակել են ֆանտաստիկ: Շատերի համար անհավանական է, թվում է, որ 21-ամյա երիտասարդը կարող է նման ռեկորդներ գրանցել: Վերջին 20 տարիներին ունեցել ենք ուժեղ ծանրորդներ, բայց Մարտիրոսյանի հաջողությունն իսկապես ցնցող էր:
Անկախ Հայաստանի պատմության մեջ Մարտիրոսյանը ցուցադրեց բոլորովին նոր որակի ելույթ: Հատկանշական է նաև, որ նոր որակի նվաճումը տեղի ունեցավ նոր Հայաստանում: Տպավորիչ էր նաև, որ պարգևատրման արարողությունից հետո Մարտիրոսյանը երգեց Հայաստանի պետական օրհներգը ինչը պետք է օրինակ ծառայի մեր մյուս մարզիկների ու մասնավորապես ֆուտբոլի Հայաստանի ազգային հավաքականի խաղացողների համար: «Անկրկնելի զգացողություն էր չեմպիոն դառնալը: Դեռևս չեմ գիտակցում, որ չեմպիոն եմ, բայց երբ սոցիալական կայքերում տեսնում եմ, թե ինչպես են մարդիկ ուրախանում իմ հաջողությամբ, նոր հասկանում եմ՝ ինչ եմ արել»,-ասաց Մարտիրոսյանը: Վերջինս նշեց, որ պոկում վարժության երրորդ մոտեցումը չի ընկճել իրեն, և արդեն մոռացել է այդ մասին: «Մյուս տարի Եվրոպայի և աշխարհի առաջնությանը որ ռեկորդներ կլինեն` կկրկնենք և կգերազանցենք այս ռեկորդները»,-ասաց նա:
«Հակառակորդներս իհարկե ուժեղ մրցակիցներ էին, սակայն այս անգամ ես ավելի լավ էի պատրաստվել»,-եզրափակեց Մարտիրոսյանը: Փառահեղ ելույթից հետո Մարտիրոսյանին շնորհավորեց ՀՀ վարչապետի պաշտոնակատար Նիկոլ Փաշինյանը: «Հզոր ժողովրդի հզոր զավակ։ Շնորհավորում եմ բոլորիս այս հրաշալի հաղթանակի կապակցությամբ»,- ֆեյսբուքյան իր էջում գրել է Փաշինյանը։ Կասկածից վեր է, որ Մարտիրոսյանը մոտ մեկ ամսից կճանաչվի 2018 թվականի Հայաստանի լավագույն մարզիկ: Տարիներ շարունակ մենք ծանրամարտի ասպարեզում սպասել էինք նման հաջողության: Այսօր ունենք համաշխարհային մակարդակի ծանրորդ, որը ոգևորությունից և հպարտությունից զատ նաև պարտավորեցնող պետք է լինի: Պարտավորեցնող պետության համար, որպեսզի Մարտիրոսյանին և նման արդյունք ցույց տված մարզիկները այսպես ասած աչքի լույսի պես պահվեն: 2020 թվականին տեղի կունենան ամառային Օլիմպիական խաղերը և ի դեմս Մարտիրոսյանի մենք ունենք ոսկե մեդալի իրական հավակնորդ: Նշենք, որ անկախ Հայաստանի պատմության մեջ Օլիմպիական խաղերում ծանրամարտում չեմպիոն չենք ունեցել: Ու հիմա ունենք այդ հնարավորությունը, որն ամեն գնով պետք է փորձենք օգտագործել:
Երկու տարի առաջ 19 տարեկան հասակում Մարտիրոսյանը դարձավ Օլիմպիական խաղերի արծաթե մեդալակիր: Այս երկու տարիների ընթացքում մեր չեմպիոնը զգալի աճ է գրանցել և վստահ ենք, որ առաջիկայում այս ծանրորդը կավելացնի մեդալների պաշարը: Հիշեցնենք, որ Մարտիրոսյանը Եվրոպայի 2017 թվականի չեմպիոն է, ինչպես նաև 2014 թվականի պատանեկան Օլիմպիական խաղերի հաղթող: Այս տարվա հոկտեմբերին Լեհաստանում կայացած Եվրոպայի մինչև 23 տարեկանների առաջնությունում Մարտիրոսյանը ևս չեմպիոն էր դարձել:
Կազմակերպիչները տղամարդկանց պայքարում լավագույնը ճանաչել էին հայ մարզիկին:
