Կոսովոյի բանակի ստեղծման վրա, որի դեմ կտրուկ հանդես է եկել Սերբիան, հանրապետությունը ծրագրում է 3 տարվա ընթացքում ծախսել 300 մլն եվրո: Այս մասին հաղորդում է խորվաթական Vecernji list պարբերականը:
Բանակի ստեղծման մասին օրենքին՝ չնայած միջազգային հանրության որոշ մասի և Բելգրադի դիմակայությանը, Կոսովոյի խորհրդարանը 1-ին ընթերցմամբ կողմ է քվեարկել հոկտեմբերին: Մասնավորապես պատգամավորները հավանության են արժանացրել 3 փաստաթուղթ, որոնք մեծացնում են Կոսովոյի անվտանգության ուժերի լիազորությունները՝ դրանք վերածելով լիարժեք զինված ուժերի: Տեղի իշխանությունների որոշման համաձայն՝ դրանք պետք է կազմված լինեն 5 հազար զինծառայողներից:
Կոսովոյի անվտանգության ուժերը, ինչպես բացատրում է Vecernji list-ը, մինչ այժմ գործել են սահմանափակ քանակությամբ առաքելություններով: Օրինակ՝ Կոսովոյի ամբողջականության և ինքնիշխանության պահպանումը մինչ այս պահը բացառապես ՆԱՏՕ-ի գլխավորությամբ միջազգային ուժերի խնդիրն է:
