Վաղը հոկտեմբերի 27-ն է։ Ահաբեկչությունից անցել է արդեն 19 տարի։ Մարտի 1-ի և հոկտեմբերի 27-ի ոճրագործությունների բացահայտման հնարավորության մասին Հայաստանում սկսեցին խոսել թավշյա հեղափոխության հենց առաջին օրերից։Հասկանալի տրամաբանությամբ այդ խոսակցությունները կապվում էին երկրում կատարված արմատական փոփոխության հետ։ Ի վերջո, իշխանությունը թողել են նրանք, ովքեր, մեղմ ասած, երբևէ իրական շահագրգռվածություն չեն ցուցաբերել Հայաստանի պետականությանը այդպիսի ծանր հարված հասցրած ոճրագործությունների բացահայտման գործում։Նախկին իշխանությունները, տարիներ շարունակ հետևողականորեն փորձել են «ջրել» Հոկտեմբերի 27-ի հիմնական, արժանահավատ վարկածը՝ շրջանառու դարձնելով մանիպուլյատիվ անհեթեթ վարկածներ, որոնք դրանց հեղինակները փորձել են նույնքան ծանրակշիռ դարձնել՝ ինչպիսին չհերքված, բազմաթիվ հանգամանքներով հաստատված հիմնական վարկածն է։ Դրանից ոչինչ չի փոխվել։ Այսօր էլ Մարտի 1-ի ու Հոկտեմբերի 27-ի ոճրագործությունների բացահայտումը կենսական է Հայաստանի համար: Թեմայի շուրջ «Առաջին լրատվական»- ի հետ քննարկմանը մասնակցեցեին Ռիմա Դեմիրճյանը՝ Կարեն Դեմիրճյանի այրի այրին, Անահիտ Բախշյանը՝ Յուրի Բախշյանի այրին և Արմենուհի Արմենակյանը՝ Արմենակ Արմենակյանի այրին:
«Մի նոր ալիք է բարձրացել, անընդհատ գալիս են. խոսում, հիշում. կարծես երեկ է այդ ամենը կատարվել, հիշատակը վառ է մնացել»,- ասաց Ռիմա Դեմիրճյանը:
Անահիտ Բախշյանը նշեց, որ Հոկտեմբերի 27-ը երբեք միայն ընտանեկան հիշատակի արարողություն չի եղել, միշտ տարբեր խմբեր են միացել և այցելել պանթեոն: Այդ օրը հիշատակի օր է բոլորի համար: «Ես վաղուց չեմ մասնակցում ԱԺ-ի կազմակերպած միջոցառումներին, կեղծ բան կա մեջը: Ինձ համար այդպես էլ անհասկանալի մնաց, թե ինչու հուշարձանը, որ պետք է հասանելի և բաց տարածքում կանգնեցվեր, դրվեց փակ տեղում, հիմա նույնպես ԱԺ հարակից այդ տարածքը փակ է»,- նշեց Ա. Բախշյանը:
«Դժնդակ օրվանից անցել է արդեն 19 տարի, կարծես թե մեկ ակնթարթում անցան երկար ու ձիգ տարիները, զինակից ընկերներն, անշուշտ, այցելում եմ Ա. Արմենակյանին շիրիմին: Մեզ շատ է հուզում, որ նա ռազմի դաշտից վերադարձավ հաղթանակով, բայց ընկավ հայ ստահակի ձեռքով:
Հոկտեմբերի 27-ը հայ ժողովրդի պատմության մեջ սև էջով գրվեց, և մինչ այսօր էլ չենք ընկալում, թե ինչպես հնարավոր եղավ կատարել այդպիսի ոճրագործություն, գլխատել ԱԺ-ն. Ինչպես մեր ընտանիքները, այնպես էլ հայ ժողովուրդը որբացավ,- նշեց Արմենուհի Արմենակյանը:
Ա. Բախշյանի խոսքով՝ դատավարությունը խեղաթյուրեց ամեն ինչ. «Ես մասնակցել եմ բոլոր դատական նիստերին և տեսել, թե ինչպես է ընթացքը ծռվում»:
Ռ. Դեմիրճյանը հավելեց, որ երբ դատավարությունը սկսվեց, առաջին իսկ նիստից հետո զգացել է՝ ինչ է կատարվում, հասկացել, որ չի բացահայտվելու:
Հոկտեմբերի 27- ի զոհերի այրիները հավատացած են, որ Հոկտեմբերի 27-ը աշխարհաքաղաքական հարց է. գլուխը շատ հեռու է հորած:
Մանրամասն՝ տեսանյութում:
