Հունան Պողոսյանի` Սյունիքի մարզպետ նշանակումը չեմ մեկնաբանում, քանի որ այդ նշանակումը վարչապետի լիազորությունն է. եթե Հունան Պողոսյանը ընդունել է առաջարկը, դա իր որոշումն է: Այս մասին «Առաջին լրատվական.-ի հետ զրույցում նշեց ԱԺ փոխնախագահ, ՀՀԿ մամուլի խոսնակ Էդուարդ Շարմազանովը:
«Ես ինչպես նախկինում, հիմա էլ ցանկացած նշանակում շնորհավորում եմ, Աստված տա Հունան Պողոսյանի լավ իրականացնի իր վրա դրված պարտավորությունները»,-ասաց նա:
Ինչ վերաբերում է իշխող քաղաքական ուժի ցուցակում ՀՀԿ-ականներ ընդգրկելու հնարավորությանը, Շարմազանովն ասաց. «Ինչի մենք կուսակցություն չունե՞նք, որ մեր ցուցակով գնանք: Ինչ վերաբերում է բարիկադներ կառուցելուն և քանդելուն, ապա բարիկադներ կառուցելու կարիք չկար, կարիք րչկար ազգին բաժանել սև ու սպիտակի, հեղափոխականի և հակահեղափոխականի, կարիք չկար ԱԺ-ն պաշարել, կարիք չկար ասֆալտին փռելու կոչեր անել, կարիք չկար ԱԱԾ-ով վախեցնել, կարիք չկար կոպտորեն խախտելու Սահմանադրությունը, մտնել դատական և օրենսդիր իշխանության տիրույթ, հետո ասել, թե բարիկադները քանդելու ժամանակն է: Էդ բարիկադները ես եմ կառուցե՞լ, պարոն Փաշինյան: ՀՀԿ-ն ձեզ հնարավարություն տվեց դառնալ վարչապետ, ՀՀԿ-ն ձեր ոչ մի օրենսդրական նախաձեռնություն չխոչնդոտեց, ՀՀԿ-ն ոչ մի պայմանավորվածություն չխախտեց, ամեն գնով իշխանությունը չպահեց: Բայց դուք ունեցաք օգոստոսի 17-ի հայտնի ելույթը»,-հայտարարեց Շարմազանովը՝ հավելելով, որ հիմա արդեն երբ վարչապետը հաղթել է, բարիացել է ու բարիկադներ քանդելու կոչ է անում:
