Ուկրաինայի վարչապետ Նիկոլայ Ազարովը երեկ կառավարության նիստում հատուկ աշխատանքային խմբին հանձնարարել է մինչև մարտ նախապատրաստել ԵՄ-ի հետ Ասոցացման համաձայնագրի վերաբերյալ «մանրամասն բանակցային դիրքորոշումներ»: Պետք է որոշել պայմանները, որոնց դեպքում Ուկրաինան ի կատար կածի համաձայնագիրը, և հետևանքները՝ յուրաքանչյուր ոլորտի համար: Այս մասին հայտնում է Vedomosti-ն:
ԵՄ-ում ուկրաինական ներկայացուցչությունը շարունակում է խորհրդակցությունները համաձայնագրի շուրջ՝ այս շաբաթ հայտնել էր Ուկրաինայի ԱԳՆ ներկայացուցիչ Եվգենի Պերեբեյնոսը, իսկ շուտով կվերսկսվեն խորհրդակցությունները նաև միջկառավարական մակարդակով: Նրա խոսքով՝ Ասոցացման համաձայնագիրը ծրագրվում է ստորագրել հնարավորինս արագ՝ երբ կողմերը պատրաստ լինեն:
Կիևը պաշտոնապես խոստովանել էր, որ երկրին առավել շահավետ է Մաքսային միության հետ համագործակցելը՝ ձգձգելով բանակցությունները ԵՄ-ի հետ: Եթե Ուկրաինան նոյեմբերին ստորագրեր համաձայնագիրը ԵՄ-ի հետ, ապա 2014-ին 37 միլիարդ դոլար կկորցներ: Իսկ շնորհիվ հետաձգման և ռուսական ֆինանսական օգնության՝ Ուկրաինան շահել է 5 մլրդ դոլար:
Եթե Ուկրաինան որոշի թուլացնել կախվածությունը Ռուսաստանից և ընտրի եվրաինտեգրումը, ապա ստիպված կլինի դիմել ԱՄՀ-ի վարկերին՝ հայտնում է Morgan Stanley-ն: Իսկ դրա համար պետք է բարեփոխումներ անցկացնել՝ կրճատել բյուջեի ծախսերը, բարձրացնել էլեկտրաէներգիայի սակագները, ազատականացնել գրիվենի փոխարժեքը, այնպես որ՝ համաձայնագիրը հազիվ թե կնքվի մինչև 2015-ի մարտին կայանալիք նախագահական ընտրություններ: Ըստ ամենայնի, Ուկրաինան կնախընտրի հետաձգել ոչ հեշտ որոշումները հնարավորինս երկար՝ եզրափակել է Morgan Stanley ամերիկյան կոմերցիոն բանկը:
