Արդեն հաղորդել ենք, որ Կազանում ավարտվել է Հայաստանի, Ադրբեջանի ու Ռուսաստանի նախագահների հանդիպումը: Այն տևել է 3 ժամից ավելի: Հանդիպման արդյունքներով ընդունվել է համատեղ հայտարարություն:
Դրանում ասվում է. «Պետության ղեկավարները հաստատել են մի շարք խնդիրների շուրջ փոխադարձ ըմբռնման կայացումը, որոնց լուծումը կնպաստի հիմնարար սկզբունքների հավանության արժանացման համար պայմանների ստեղծմանը»:
Փաստաթղթում ասվում է, որ հանդիպման մասնակիցները դիտարկել են հիմնարար սկզբունքների նախագծի համաձայնեցման նպատակով անցկացրած աշխատանքների ընթացքը: Հայաստանի ու Ադրբեջանի նախագահներն իրենց երախտագիտությունն են հայտնել ԵԱՀԿ Մինսկի խմբի համանախագահող երկրների (ԱՄՆ, Ռուսաստան, Ֆրանսիա) ղեկավարներին` ղարաբաղյան հակամարտության կարգավորման վերաբերյալ նրանց ցուցաբերած մշտական ուշադրության համար: Նրանք բարձր են գնահատել Ռուսաստանի նախագահի անձնական ջանքերը` պայմանավորվածությունների ձեռք բերմանը ցուցաբերած աջակցության համար:
