«Ես ոչ մի կերպ չեմ հասկանում ՀՅԴ-ի ու ԲՀԿ-ի պահվածքը։ Եթե նրանք հեղափոխությունից հետո համաձայնության էին եկել վարչապետ Փաշինյանի հետ, ապա ինչու երեկ փորձեցին խոչընդոտել արտահերթ խորհրդարանական ընտրությունների անցկացումը։ Հակառակը՝ իրենք պետք է շահագրգռված լինեին ընտրությունները շուտափույթ անցկացնելու հարցում»,-«Առաջին լրատվական»-ի հետ զրույցում ասաց «Կալիֆորնիա Կուրիեր» թերթի գլխավոր խմբագիր, ՀՅԴ-ական Հարութ Սասունյանը՝ անդրադառնալով երեկ երեկոյան տեղի ունեցած զարգացումներին։
Նրա խոսքով՝ հասկանալի է, որ կուսակցությունները մտածում էին, որ եթե երկարաձգեն արտահերթ խորհրդարանական ընտրությունների անցկացումը, ապա ժողովրդի մոտ առկա հեղափոխական էյֆորիան կանցնի, և ընտրությունների արդյունքները այնքան էլ հաջող չեն լինի Փաշինյանի համար, բայց դա ճիշտ կանխատեսում չէր: «Ժողովուրդն այնքան խանդավառ է վերջին շրջանի փոփոխություններով, այնքան երկար տարիներ է սպասել, որ այս փոփոխությունները լինեն, որ կարծում եմ՝ դեկտեմբերին լինեն ընտրությունները, թե հունիսին, արդյունքները նույնը կլինեն, ինչ Երևանի ավագանու ընտրությունների ժամանակ»,- նկատեց Սասունյանը։
Մեր դիտարկմանը՝ ՀՅԴ-ի ու ԲՀԿ-ի երեկվա գործողությունները ինքնաբո՞ւխ էին, թե՞ ամեն դեպքում կա մեկը, ով հրահրել, կազմակերպել էր այս ամենը, Սասունյանը պատասխանեց. «Երկար տարիներ ինչ որ տեղի է ունենում Հայաստանում, հայության մեջ, հայերը պարբերաբար փնտրում են գաղտնի մի ձեռքի, մի ուժի, որը վարագույրի հետևից ուղղորդում է ամեն ինչ։ Կարծում եմ՝ այդքան կասկածամիտ լինելը լավ չէ մեզ համար։ Ինչ որ կուսակցությունները որոշում են, իրենց կուսակցական որոշումն է, ոչ մեկը՝ լինի դա նախկին նախագահ կամ վարչապետ, չի կարող ուղղորդել գլխավոր, մեծ կուսակցություններին»,- ասաց Սասունյանը։
Մեր հարցին՝ այդ դեպքում ի՞նչը կարող էր դրդել իշխանության մաս կազմող կուսակցություններին դեմ դուրս գալ նույն իշխանությանը, իշխանության նախաձեռնություններին, Սասունյանը պատասխանեց. «Ես ոչ մի տեղեկություն չունեմ, թե ինչու ԲՀԿ-ն ու ՀՅԴ-ն նման որոշում կայացրեցին և գնացին իրենց նախարարները կորցնելու ռիսկին։ Չեմ էլ կարող նույնիսկ ենթադրել դրդապատճառը, բայց չեմ էլ կարող ենթադրել, որ դրա հետևում մութ ուժեր կան՝ Քոչարյանը կամ մեկ ուրիշը։ Ես այդ հարցով որևէ մեկի հետ չեմ խոսել, և որևէ մեկը ինձ հետ չի խոսել»,- ասաց մեր զրուցակիցը։
