ԱՄՆ-ում բնակվող տղային այնքան դուր չէր գալիս ծնողներից գումար խնդրելը, որ նա որոշեց ձեռներեց դառնալ: Աշակերտը գիրք է գրել, թե ինչպես երեխաները կարող են գումար վաստակել, և այժմ այն վաճառում է Նյու Յորքի փողոցներում, գրում է NY Post-ը:
13-ամյա Ջոն Լոզոնիսը դասերից հետո Նյու Յորքում վաճառում է «Տրիլիոնատեր երեխան: Ինչպե՞ս փոքրիկ երեխաները կարող են կարողություն կուտակել» գիրքը: Այն կարելի է գնել 10 դոլարով: Գրքում տղան մյուս երեխաներին խորհուրդներ է տալիս, թե ինչպես կարող են գումար վաստակել: Նա օրական շուրջ երեսուն օրինակ գիրք է վաճառում:
Գիրքը գրելու համար Ջոնն ուսումնասիրել է հայտնի մեծահարուստների կենսագրությունը և իմացել, թե ինչպես են երիտասարդ տարիքում նրանք կարողացել եկամուտ ստանալ: Բացի այդ, տղան բերում է նաև իր օրինակը:
Ջոնն առաջին անգամ ձեռներեցությամբ զբաղվեց, երբ տասը տարեկան էր: Այդ ժամանակ նա նկատեց, որ իր սիրելի սրճարանը կայք չունի: Ջոնն ութ տարեկանից կարողանում է ծրագրավորել, ուստի նա սրճարանի համար համացանցում էջ ստեղծեց: Դրա համար նա 60 դոլար ստացավ:
Հետո, տեսնելով, որ փողոցում լիմոնադ վաճառելն այնքան էլ եկամտաբեր չէ, Ջոնը սկսեց գրաֆիկական դիզայնի, կայքերի մշակման, տեսագրությունը մոնտաժելու պատվերներ ընդունել:
Ջոնը չի հստակեցնում, թե այժմ ամսական որքան է վաստակում: Նա, սակայն վստահեցնում է, որ գրպանի փողն իրեն բավարարում է և ծնողներից էլ գումար չի վերցնում:
