Ուզբեկստանի նախագահի ավագ դուստր Գյուլնարա Կարիմովան, նոր տեսահոլովակ է թողարկել՝ Yonimda bo’ling («Ինձ հետ եղիր») երգի հիման վրա: Երգը ստեղծվել է 2013-ի մայիսին: Հունվարի 2-ից, երբ տեսահոլովակը ներբեռնվել է համացանցում, այն դիտել են մոտ 10 000 անգամ: Twitter-ի իր միկրոբլոգում երգչուհին տեսահոլովակն անվանել է «երկար սպասված նվեր»:
Գյուլնարա Կարիմովան պրոֆեսիոնալ մակարդակով զբաղվել է վոկալով (մեցցո-սոպրանո): Նա երգում է, բանաստեղծություններ գրում, երաժշտություն ստեղծում՝ Գուգուշա կեղծանունով:
Նախօրեին «Բիրժևոյ լիդեր» օնլայն-պարբերականը ներկայացրել է 2013-ի դեկտեմբերին Ուզբեկստանի քաղաքական գործիչների հայտնիության վարկանիշը: Ցուցակը գլխավորել է Գյուլնարա Կարիմովան, ով ակտիվորեն պայքարում է իր հոր պաշտոնի համար: Երկրորդ տեղում է պետության ղեկավարը՝ Իսլամ Կարիմովը, երրորդը Ազգային անվտանգության ծառայության ղեկավար Ռուստամ Ինոյատովն է:
2015-ին տեղի ունենալիք ընտրություններում «նախագահի դստեր շանսերն առայժմ չի կարելի մեծ անվանել, հատկապես՝ հաշվի առնելով նրա հաշիվների կալանման փաստը, բնակչության աջակցության բացակայությունը և հոր հետ վեճերը»,- գրել է «Բիրժևոյ լիդեր»-ը:
