ԵԱՀԿ Մինսկի խմբի համանախագահները սեպտեմբերի 25-27-ը ՄԱԿ-ի Գլխավոր վեհաժողովի շրջանակերում առանձին-առանձին և համատեղ հանդիպումներ են անցկացրել Հայաստանի և Ադրբեջանի արտգործնախարարների հետ: Նախարարները բանակցել են Լեռնային Ղարաբաղի հակամարտության խաղաղ կարգավորման հարցի շուրջ:
ԵԱՀԿ Մինսկի խումբը իր վերաբերմունքն արտահայտել է որոշակի տեքստով՝ հանդես գալով հայտարարությամբ:
Համանախագահները խոր ափսոսանք են հայտնել շարունակվող և անտեղի մահվան դեպքերի առնչությամբ: Նրանք զգուշացրել են նախարարներին իրավիճակի սրման վտանգների մասին, կողմերին կոչ են արել կառուցողականորեն մասնակցել դրական միջավայրի հաստատմանը և խուսափել սադրիչ հռետորաբանությունից: Համանախագահներն ընդգծել են, որ համապարփակ կարգավորումը զիջումներ է պահանջում բոլոր կողմերից:
Թեմայի շուրջ «Առաջին լրատվական»- ի հետ քննարկմանը մասնակցեցին «Հայկական շահ» գիտավերլուծական կենտրոնի փոխնախագահ Ռոբերտ Ղևոնդյանը, Կովկասի ինստիտուտի գիտաշխատող Հրանտ Միքայելյանը և Ադրբեջանի հարցերով փորձագետ Տաթև Հայրապետյանը:
Ռ.Ղևոնդյանի դիտարկմամբ՝ ԵԱՀԿ ՄԻնսկի խմբի համանախագահների հնչեցրած տեքստն այս անգամ փոքր-ինչ ավելի լավատեսական ուղղորդվածություն ունի, քանի որ հայկական կողմից սահմանին արդեն տեսան համարժեք պատասխան և ոչ թե նախորդ անգամների նման միայն դիմումներ և խաղաղության կոչեր: «Այս ուղերձում թաքնված հարց կա՝ ուղղված Հայաստանին՝ կապված վարչապետի այն խոսքի հետ, որ Հայաստանը ստիպված է եղել մարդկային կորուստներ պատճառել Ադրբեջանին: Մինսկի խմբի ուղերձում շեշտվում է այն, որ Հայաստանը և Ադրբեջանը գտնվում են հանարժեք իրավիճակում և Ադրբեջանի ցանկացած ոտնձգությանը կարող է հետևել Հայաստանի ոտնձգությունը»:
Տ. Հայրապետյանի դիտարկմամբ՝ Ն.Փաշինյանն իր քաղաքական գծով ձգտում է նրան, որ Ղարաբաղը դառնա բանակցային կողմ. «Փաշինյանը ղարաբաղյան հարցը տանում է դեպի ակունքներ, իսկ Ադրբեջանը տարիներ շարունակ փորձել է հարցը տարածքային վեճի մակարդակի հասցնել, սակայն ժողովրդի կենսական գոյության խնդրի մասին է խոսքը»:
Տ. Հայրապետյանի կարծիքով՝ Փաշինյանը փակուղի է մտցնում Բաքվի վարչակարգին:
«Ես չեմ կարծում, թե Հայաստանը պետք է համարվի թույլ կողմ,- նշեց Հ. Միքայելյանը: – Մենք պետք է հարցնենք, թե Ադրբեջանն ինչ կառաջարկի, եթե Ադրբեջանը որևէ առաջարկ չունի, ապա մենք որևէ փոխզիջումային տարբերակ չունենք»:
«Անխուսափելի պատերազմի դեպքում Հայաստանը պետք է պատրաստ լինի նախահարձակվելուն»,- ընդգծեց Ղևոնդյանը՝ հավելելով, որ Հայաստանը պետք է պատրաստվի պատերազմի:
Մանրամասն՝ տեսանյութում:
